Лінкі ўнівэрсальнага доступу

У Менску пад выглядам пошуку наркотыкаў міліцыя ў цывільным зладзіла аблаву супраць актывістаў руху «Эўрапейская Беларусь». Падчас яе актывісты былі зьбіты і затрыманы. Канфіскаваны плякаты, сьцягі, улёткі з заклікам вызваліць палітвязьняў. Міліцыянты не прадстаўляліся, ордэр на ператрус не прад’яўлялі, пратаколаў не складалі. Адзін з пабітых і затрыманых, Яраслаў Грышчэня, зьбіраецца абскарджваць дзеяньні міліцыі.

Яраслава Грышчэню, Дзьмітрыя Калача і Ганну Салаўёву а восьмай вечара міліцыянты ў цывільным затрымалі на вуліцы ў раёне плошчы Перамогі. Яраслаў кажа, што дакумэнтаў не прад’яўлялі. Хлопцаў павалілі на зямлю, зьбівалі нагамі, дзяўчыну паставілі да сьценкі. Яраславу моцна дасталося па галаве, засталіся сінякі і шышкі, ён мае падазрэньне на чэрапна-мазгавую траўму. У Грышчэні баліць і кружыцца галава, але ў шпіталь ён схадзіць яшчэ не пасьпеў:

«Спачатку далі ў галаву, а потым сказалі, што міліцыя. Першы дакумэнт пра тое, што гэта сапраўды міліцыя, я ўжо ўбачыў у Ленінскім РУУСе Менску а палове на дзясятую. Падчас ператрусу мне таксама ніхто ніякіх дакумэнтаў не паказаў, не было ні дакумэнтаў, ні панятых, нічога».
Зьбіты Яраслаў Грышчэня

Зьбіты Яраслаў Грышчэня




Яраслаў распавёў, што міліцыянты ў цывільным скарысталі ягоныя ключы і бяз санкцыі пракурора ўварваліся ў кватэру, якую выкарыстоўвае рух «Эўрапейская Беларусь». Там было яшчэ шэсьць актывістаў арганізацыі, якіх адразу паставілі да сьценкі, білі па нагах, у тым ліку дзяўчат, — паведаміў «Свабодзе» адзін зь іх, Аляксандар Салдаценка:

«Яны забралі ў нас улёткі, бел-чырвона-белыя сьцягі, газэту „Рабочая салідарнасьць“, плякаты руху „Эўрапейская Беларусь“, забралі фотаапарат, але пратаколу аб выманьні рэчаў не складалі».

Усяго, паводле спадара Салдаценкі, было забрана некалькі тысяч улётак, у тым ліку з партрэтамі палітвязьняў, зь лёзунгам «Саньнікаў — наш прэзыдэнт», налепкі з надпісам «Страху няма!»

Людзі ў чорным уварваліся ў кватэру нібыта для пошуку наркотыкаў, але забралі друкаваную прадукцыю, пагражалі арыштам у СІЗА КДБ. Пазьней шасьцёх чалавек завезьлі ў Савецкі РУУС Менску, трох — у Ленінскі. Там іх апыталі і адпусьцілі без складаньня пратаколу.

Яраслаў Грышчэня зьбіраецца зьняць пабоі, пайсьці да сьледчага ў Савецкі РУУС, напісаць скаргі на незаконныя дзеяньні міліцыі:
А калі ты ім кажаш: «Вы не прадставіліся», ён адказвае, што паказаў табе дакумэнт, калі ты тварам да зямлі ляжаў…

«Пайду на «Вясну» і буду пісаць, пісаць і пісаць. Такога бяспраўя я яшчэ ў жыцьці ня бачыў. Ніводзін супрацоўнік міліцыі ня мае права паводзіць сябе як бандыт ці крымінальнік. Яны лаюць матам усіх, а потым разьбіраюцца: а што было, навошта яны кагосьці білі і гэтак далей. А калі ты ім кажаш: «Вы не прадставіліся», ён адказвае, што паказаў табе дакумэнт, калі ты тварам да зямлі ляжаў… Прабачце, гэта ўжо нейкі «гоп-стоп».

Праваабаронца Антаніна Кавалёва зазначае: расповед зьбітых і затрыманых актывістаў сьведчыць пра тое, што міліцыянты груба парушылі ўсе працэсуальныя нормы — не прад’явілі свае дакумэнты і пастанову пракурора на ператрус, не запрасілі панятых, ня кажучы ўжо пра нематываванае ўжываньне сілы. Спадарыня Кавалёва мяркуе, што трэба абскарджваць усе гэтыя парушэньні:

«Дзівіцца, вядома, тут не даводзіцца, бо мы прывыклі ўжо да парушэньня ўсялякіх нормаў, і маральных, і прававых. Але пакідаць гэта проста так нельга. Апошнім часам пачасьціліся выпадкі парушэньня гэтых нормаў, яны зрабіліся больш брутальнымі, неапраўданымі. Як юрыст я перакананая, што на гэта трэба рэагаваць і фіксаваць кожнае парушэньне».
Увогуле на маёй практыцы я не сутыкаўся з тым, каб затрыманых зьбівалі.

Прэсавы сакратар менскай міліцыі Аляксандар Ластоўскі заявіў «Свабодзе», што нічога ня ведае пра выпадак з актывістамі «Эўрапейскай Беларусі»:

«Увогуле на маёй практыцы я не сутыкаўся з тым, каб затрыманых зьбівалі. Часьцяком гэта аказваецца проста выдумкай. Як правіла, гэта не пацьвярджаецца ніколі. Я магу сказаць толькі адно: калі яны лічаць, што супрацоўнікі міліцыі перавышалі свае паўнамоцтвы, калі сапраўды падзеі, якія яны апісваюць, мелі месца, тады яны маюць права на скаргу».

Ваша меркаваньне

Паказаць камэнтары

XS
SM
MD
LG