Лінкі ўнівэрсальнага доступу

logo-print

Грамадзкі лідэр году — Алесь Бяляцкі


Цьвікі, упрыгожаныя стужкамі, перадалі працоўным-страйкоўцам у Барысаве.

Цьвікі, упрыгожаныя стужкамі, перадалі працоўным-страйкоўцам у Барысаве.

7 лютага Асамблея няўрадавых арганізацый уручыла прэміі грамадзкім актывістам.

Прэмія была заснаваная Асамблеяй НДА 3 гады таму, каб адзначыць тыя выбітныя грамадзянскія кампаніі, няўрадавыя арганізацыі, актывістаў, якія ў мінулым годзе фармавалі ляндшафт грамадзянскай супольнасьці, тых, хто праявіў сябе самым яркім чынам.

Старшыня працоўнай групы Асамблеі няўрадавых арганізацый Сяргей Мацкевіч:

«Звычайна ўсплёск грамадзкай актыўнасьці адзначаецца ў нас у тыя гады, калі ў краіне адбываюцца прэзыдэнцкія ці парлямэнцкія выбары. Летась такіх выбараў не было, але мы сталі сьведкамі шматлікіх падзей у грамадзкім сэктары: як гучных, так і маўклівых, як выніковых, так, на жаль, часам і безвыніковых, ад натхняльных, узьнёслых да сумных і нават трагічных.

Сяргей Мацкевіч

Сяргей Мацкевіч



У намінацыі «Месца году» перамагла галерэя «Ў».

Арт-дырэктар галерэі Ганна Чыстасэрдава: «Нам вельмі прыемна, што прасоўваньне сучаснай беларускай культуры таксама робіцца і непасрэдна вашымі рукамі. Дарэчы, у сераду адбудзецца прэзэнтацыя праекту „Прэс-фота — 2011“».

Найлепшай грамадзкай ініцыятывай году аўтарытэтнае журы з 38 прадстаўнікоў грамадзкіх аб’яднаньняў і амаль дзясятка мінулагодніх пераможцаў прызнала праект «Народны журналіст». Дарэчы, у складзе журы — шмат аўтарытэтных асобаў: рэжысэр Валер Мазынскі, лінгвіст Пётра Садоўскі, культуроляг Вацлаў Арэшка ды іншыя.

У базе «Народнага журналіста» цяпер больш за 300 чалавек па ўсёй Беларусі, і улада ў некаторых рэгіёнах проста замітусілася, кажа Вінцук Вячорка:

«Наша пераможца першага туру, Валянціна Шалейнікава, знакамітая змагарка за Севастопальскі парк, выйграла адно са змаганьгняў — за дзіцячы садак побач з паркам. А калі знакаміты блюзмэн зь Бялынічаў, ён жа народны журналіст Юрась Несьцярэнка, пайшоў фатаграфаваць дзікасьці і хібы на свой аматарскі фотаапарат, то ўжо ў працэсе гэтых здымкаў уладу апанавала шаленства, і яны хуценька паправілі ўсё, што маглі».

У намінацыі «Рэгістрацыя году» было ўсяго толькі 6 прэтэндэнтаў.

Вядоўца імпрэзы Юлія Сівец: «Увогуле, калі б Мін’юст рэальна працаваў, заглядаючы ў законы і Канстытуцыю, то прэтэндэнтаў у намінацыі „Рэгістрацыя году“ было б значна болей. А так наш Мі’юст, як той акаўнт малакамунікабэльны ў „Фэйсбуку“, мае мала сяброў. Зрэшты, самі і вінаватыя».

У намінацыі «Рэгістрацыя году» перамог «Офіс па правах людзей з інваліднасьцю».

А вось што да намінацыі «Не рэгістрацыя году», прэтэндэнтаў вельмі шмат, кажа вядоўца імпрэзы Мякола Бянько:

«Для таго, каб іх усіх падлічыць, напэўна, спатрэбіцца звышмагутнасьць кампутара Саюзнай дзяржавы „Скіф“, інакш проста ня справіцца — настолькі шмат палітычна матываваных, неабгрунтаваных адмоваў дае наш дарагі Мін’юст».

У намінацыі «Не рэгістрацыя году» журы прызнала найбольш арыгінальнай адмову «Цэнтру разьвіцьця валантэрства». Прычына — кіраўнік цэнтру Мікалай Кванталіяні адмовіўся прыняць умовы рэгістрацыі — супрацоўніцтва з КДБ:

«Тыя ўмовы, на якіх яны прапаноўвалі рэгістрацыю, былі для мяне адназначна непрымальнымі».

Мікалай Кванталіяні

Мікалай Кванталіяні



Найлепшай кампаніяй году прызнаная кампанія па зборы подпісаў за непрыняцьце закону аб некамэрцыйных арганізацыях.

Юрыст і палітоляг Юрась Чавусаў: «Закон не прыняты, а подпісаў мы сабралі, напэўна, рэкордную колькасьць у гісторыі такіх кампаній — 370 тысяч чалавек уваходзяць у арганізацыі, якія падпісаліся супраць гэтага закону.

Найлепшай рэгіянальнай падзеяй году абвешчаны страйк супрацоўнікаў жыльлёва-камунальнай гаспадаркі гораду Барысава. Самі супрацоўнікі ЖКГ пабаяліся прыбыць на цырымонію і дэлегавалі барысаўскага журналіста Міхаіла Васільева. Да дыплёму, гадзіньніка і кубкаў барысаўскім камунальнікам перадалі цэлы набор цьвікоў зь бел-чырвона-белымі банцікамі:

«Гэта такія самаробныя падарункі. Як сказаў клясык, „цьвікі б рабіць з такіх людзей“, як прадстаўнікі жыльлёва-камунальнай гаспадаркі гораду Барысава».

Міхаіл Васільеў

Міхаіл Васільеў



«Крэатывам году» прызнаны электронны сайт наяўнага абмену валют Prokopovi.ch. Але стваральнікі сайту не адважыліся прыйсьці за ўзнагародай і даслалі свой аўдыёзварот:

«Мы сапраўды хацелі б прысутнічаць, але застацца на свабодзе хочацца яшчэ больш. Ідэя даслаць запрашэньне самому Пракаповічу — усё ж такі мы пазычылі яго сьветлы вобраз і імя — на жаль, не знайшла падтрымкі ў часткі нашага калектыву».

Так што ўзнагарода пакуль застаецца ў офісе Асамблеі НДА.

Грамадзкім лідэрам году стаў кіраўнік праваабарончай арганізацыі «Вясна» Алесь Бяляцкі. Паколькі ён знаходзіцца за кратамі, узнагароду прыняў ягоны калега Валянцін Стэфановіч:

«Паколькі наш галоўны „лесавік“ пакуль ня з намі, але, нягледзячы на 30-градусныя маразы, магу вам з упэненасьцю сказаць, што вясна ўсё ж такі прыйдзе».


Узнагароду Алеся Беляцкага перадалі Валянціну Стэфановічу і Тацяне Равяцы.

Узнагароду Алеся Беляцкага перадалі Валянціну Стэфановічу і Тацяне Равяцы.



Усе пераможцы атрымалі ганаровыя дыплёмы і падарункі.
XS
SM
MD
LG