Лінкі ўнівэрсальнага доступу

Зьміцер Бандарэнка напісаў прашэньне аб памілаваньні


Зьміцер Бандарэнка

Зьміцер Бандарэнка

Пра гэта стала вядома 4 лютага, калі ён патэлефанаваў з калёніі сваёй жонцы Вользе. Палітвязень сказаў, што напісаў прашэньне 1 лютага.

Гэту інфармацыю «Свабодзе» пацьвердзіў паплечнік Зьмітра Банадарэнкі Аляксандар Атрошчанкаў.

Зьміцер Бандарэнка мае вельмі сур’ёзныя праблемы са здароўем. З 30 студзеня ў дачыненьні да яго, хаця Бандарэнка перанёс цяжкую апэрацыю на хрыбетніку, уступілі ў дзеяньне яшчэ больш жорсткія ўмовы ўтрыманьня. Яму забаронена карыстацца мыліцай, не дазволены артапэдычны абутак, які перадала жонка і яшчэ шмат чаго.

2 лютага Бандарэнку вярнулі мыліцу і артапэдычны абутак, дазволілі не хадзіць у шэрагу.

7 красавіка давераную асобу кандыдата на прэзыдэнта Андрэя Саньнікава, каардынатара «Эўрапейскай Беларусі» Зьмітра Бандарэнку асудзілі на 2 гады калёніі агульнага рэжыму.

У палітыка пасьля арышту дыягнаставалі некалькі грыжаў дыскаў хрыбетніка і ўшчамленьне сьпіннамазгавых нэрваў. 25 ліпеня яго даставілі з Рэспубліканскай турэмнай бальніцы на вуліцы Валадарскага ў 5-ю бальніцу, дзе на наступны дзень зрабілі апэрацыю.


Фядута: «Бандарэнка давёў да ўсіх — ён здольны на моцныя, мужныя ўчынкі»

Аляксандар Фядута

Аляксандар Фядута

Лёс Аляксандра Фядуты ў нечым падобны на лёс Зьміцера Бандарэнкі. Фядута таксама прасядзеў за кратамі, ды і са здароўем у яго ня вельмі:

«Ніхто не мае права прымушаць таго ці іншага чалавека рызыкаваць сваім жыцьцём, і сваім здароўем. Бандарэнка давёў да ўсіх, што ён здольны на моцныя, мужныя ўчынкі. Ён здольны трымаць націск. І тое, што ён толькі зараз напісаў такое прашэньне, сьведчыць пра тое, што ціск сапраўды стаў неўтрымальным.

Я лічу, што ў гэтым выпадку нам усім трэба падзякаваць за тое, што гэта ўрэшце рэшт адбылося. І што сам Зьміцер Бандарэнка, і Андрэй Саньнікаў, які падпісаў прашэньне трохі раней, у хуткім часе далучацца да нас. Да тых, хто знаходзіцца хоць на адноснай, але ўсё ж такі волі. Я вельмі ўзрушаны тым, колькі часу цярпелі ціск гэтыя людзі».

Кастусёў: «З гэтага будзе больш карысьці і яму асабіста, і нам усім»

Рыгор Кастусёў

Рыгор Кастусёў

Былы кандыдат у прэзыдэнты Беларусі Рыгор Кастусёў лічыць, што Зьміцер Бандарэнка мае поўнае права на такі ўчынак:

«Вырашаць гэта быў у праве толькі ён. І згодна з той сытуацыяй, у якой ён апынуўся. Нам, будучы на волі, цяжка меркаваць, як яму там сябе паводзіць. Таму я стаўлюся да гэтага станоўча. Гэта яго права.

Здароўе — гэта галоўная каштоўнасьць, якую чалавек павінен зьберагаць. Калі ён будзе здаровы, то з гэтага будзе больш карысьці і яму асабіста, і нам усім».


Скрабец: «Каму ў нашай краіне патрэбны інвалід?!»

Сяргей Скрабец

Сяргей Скрабец

Былы палітвязень Сяргей Скрабец адседзеў за кратамі паўтара гады, як кажуць, ад званка да званка. І як ён сама кажа: маю нейкае права выказацца адносна прашэньня Зьміцера Бандарэнкі:

«Зьміцер правільна зрабіў, што напісаў прашэньне. Здароўе яго вельмі дрэннае. А ўмовы знаходжаньня за кратамі вельмі цяжкія. Асабліва для тых, у каго здароўе ў пагоршаным стане. Там няма ні дактароў-спэцыялістаў, ні добрых лекаў.

Адтуль можна выйсьці інвалідам. І нават не за год, а толькі за месяц. А тут справа ідзе пра жыцьцё чалавека. І ў такіх умовах трэба пісаць прашэньне. Бо каму ў нашай краіне патрэбен інвалід?! Нават калі ён і палітык. Нікому».

Атрошчанкаў: «Такое прашэньне не дае рэжыму маральнай перавагі»

Аляксандар Атрошчанкаў

Аляксандар Атрошчанкаў

Каардынатар «Эўрапейскай Беларусі», прэсавы сакратар Андрэя Саньнікава Аляксандар Атрошчанкаў у размове са «Свабодай» так сказаў пра тое, што Зьміцер Бандарэнка падаў прашэньне аб памілаваньні:

«Для мяне абсалютна зразумела, што гэта зроблена пад ціскам. Калі раней ўлады маглі атрымаць з такіх прашэньняў нейкую палітычную выгаду, то цяпер я ня бачу ніякага сэнсу для тых, хто застаецца за кратамі, ад гэтага адмаўляцца. Зараз здаецца ўжо ўсім зразумела, што гэты суд ня толькі не мае юрыдычнай сілы, а і не дае маральных перавагаў рэжыму. Такія прашэньні людзі пішуць альбо пад катаваньнямі ці ва ўмовах вельмі набліжаных да катаваньняў».

Паказаць камэнтары

XS
SM
MD
LG