Лінкі ўнівэрсальнага доступу

Вылучэньне Алеся Бяляцкага на Нобэля: рэакцыі


Алесь Бяляцкі

Алесь Бяляцкі

27 студзеня ў Варшаве адбылася прэзэнтацыя афіцыйнай заявы дэпутатаў польскага Сэйму ў справе вылучэньня на Нобэлеўскую прэмію міру беларускага праваабаронцы Алеся Бяляцкага. Пад гэтым дакумэнтам паставілі свае подпісы ня толькі польскія дэпутаты, але і парлямэнтары з 27 краін, што ўваходзяць у Раду Эўропы.

Кіраўнік дэпутацкай групы ў справах Беларусі польскага сэйму Робэрт Тышкевіч:

«Ініцыятыва прысуджэньня Нобэлеўскай прэміі міру Алесю Бяляцкаму ёсьць прызнаньне праз эўрапейскую дэмакратычную супольнасьць ягоных выбітных заслуг у галіне абароны правоў чалавека і грамадзяніна. Вылучэньне мае вялікую падтрымку ў краінах Эўразьвязу. І гэта прызнаньне ролі ўсёй беларускай апазыцыі, усіх грамадзкіх арганізацый, якія змагаюцца за дэмакратычныя правы і свабоды.

Лічу, што было б сапраўды выдатна, калі б Алесь Бяляцкі гэтую ўзнагароду атрымаў. Будзем рабіць усё, каб так атрымалася».

Уладзімер Някляеў

Уладзімер Някляеў

Былы кандыдат у прэзыдэнты Беларусі Ўладзімер Някляеў спадзяецца на посьпех гэтай ініцыятывы:

«Дзякуй Богу, калі гэта станецца. Я ўжо маю на ўвазе тое, што можа стацца ў выніку гэтага вылучэньня.

Мы ўжо даўно намагаемся ў гэтым накірунку нешта зрабіць. Вылучаўся Васіль Быкаў — як літаратар, зразумела. Вылучаўся Рыгор Барадулін. Але пакуль што нічога не выходзіла.

І справа ў тым, каб Беларусь наагул займела гэтую прэстыжную адзнаку. Бо гэта будзе на карысьць нам усім — народу, краіне. А найперш будучыні нашай краіны, да якой праз гэта будзе прыцягнута дадаткова ўвага міжнароднай супольнасьці».

Юры Хадыка

Юры Хадыка

«Вялікай падтрымкай беларускай дэмакратычнай супольнасьці» назваў сёньняшняе рашэньне польскага сэйму прафэсар Юры Хадыка:

«Я ня думаю, што Лукашэнка выпусьціць Алеся ў выніку гэтага вылучэньня. Але ж сытуацыя стане зусім не зразумелай, калі Бяляцкі насамрэч атрымае гэтую прэмію. Мы павінны быць вельмі ўдзячныя польскаму сэйму за ягонае рашэньне».

Алеся Бяляцкага вылучаюць на прэмію Нобэля і іншыя вядомыя асобы. Гэтак, пяць дэпутатаў Вярхоўнай Рады Ўкраіны накіравалі ў Осла, дзе месьціцца Нобэлеўскі камітэт міру, свой намінацыйны ліст. Пра гэта «Свабодзе» сёньня паведаміў былы пасол Украіны ў Беларусі Раман Бясьсьмертны:

Раман Бясьсьмертны

Раман Бясьсьмертны

«Гэта дзейныя дэпутаты: Віктар Марчук, Леся Грыгаровіч, Мустафа Джамілёў, Анатоль Мацьвіенка і Яраслаў Кэндзер. Яны ўжо зьвязваліся з Осла, і ім паведамілі, што іх лісты дайшлі па прызначэньні.

Што тычыцца маёй думкі, то я далучаюся да сваіх былых калегаў-парлямэнтароў. Я таксама ўпэўнены, што гэты чалавек заслугоўвае прысуджэньня Нобэлеўскай прэміі. І я хачу пажадаць усяму беларускаму народу, каб імя Бяляцкага як барацьбіта за мір, як чалавека, які адстойваў годнасьць беларускага народу, заўжды было такім павадыром у цяперашніх складаных умовах».

Да агульнай кампаніі далучылася і Шырын Эбадзі — іранская адвакатка, якая атрымала Нобэлеўскую ўзнагароду ў 2003 годзе. Яна таксама даслала свой намінацыйны ліст у Осла.

Паказаць камэнтары

XS
SM
MD
LG