Лінкі ўнівэрсальнага доступу

У Баранавічах забаранілі пікет супраць зьбядненьня народу


Віктар Цяпін

Віктар Цяпін

Баранавіцкі гарвыканкам забараніў пікет супраць зьбядненьня насельніцтва. Заяўку на такую акцыю накіроўваў кіраўнік гарадзкой арганізацыі партыі левых «Справядлівы сьвет» Віктар Цяпін.

У лісьце з гарвыканкаму за подпісам намесьніка старшыні Дзьмітрыя Касьцюкевіча сьцьвярджаецца, што заяўнік парушыў артыкулы 5 і 6 Закону аб масавых мерапрыемствах. На гэтай падставе пікет і быў забаронены.

Віктар Цяпін кажа, што такі адказ чыноўнікаў — адпіска:

«Адмова абумоўленая парушэньнем артыкулаў 5 і 6 гэтага закону. Артыкул 5 — гэта парадак арганізацыі масавых мерапрыемстваў, а артыкул 6 не зусім зразумела, якім чынам яны да нас прывязалі. Бо артыкул 6 — гэта парадак разгляду заяваў аб масавых мерапрыемствах выканкамам. Атрымліваецца, што мы парушылі артыкул, які яны павінны выконваць. Увогуле, у адказе яны павінны нам дакладна расшыфраваць, што мы парушылі, а то тут — цэлы артыкул 5, а там жа колькі ўсяго! І што з гэтага мы канкрэтна ня выканалі, незразумела».

Віктар Цяпін апавёў, што ня бачыць сэнсу абскарджваць забарону ў судзе:

«Мы ўжо судоў столькі прайшлі і ніводнага ня выйгралі. Суды ўсе такія пытаньні вырашаюць на карысьць гарвыканкаму, не зьвяртаючы ўвагі на закон. Мы ўжо нават спрабавалі дабіцца, каб прызналі рашэньне гарсавету аб парадку правядзеньня масавых мерапрыемстваў у Баранавічах неканстытуцыйным. Хоць мы даказвалі, што парушаны цэлы шэраг палажэньняў Закону аб масавых мерапрыемствах і Канстытуцыі, але суд гэта абсалютна ня ўлічваў. Зараз каб ізноў зьвяртацца ў суд — гэта значыць ізноў плаціць пошліну».

Віктар Цяпін падаваў заяўку на тое, каб правесьці 28 студзеня ў Старым парку Баранавічаў пікет супраць зьбядненьня насельніцтва. Ён меркаваў, што ў пікеце возьмуць удзел да 30 чалавек.
XS
SM
MD
LG