Лінкі ўнівэрсальнага доступу

Адвакат Бурдон: Справа супраць Куляшова дакладная і пераканаўчая


Вільям Бурдон

Францускі адвакат Вільям Бурдон, які накіраваў пазоў на арышт міністра ўнутраных спраў Беларусі Анатоля Куляшова, даў інтэрвію Радыё Свабода.

«Брытанская юрыдычная кансалтынгавая фірма папрасіла майго супрацоўніцтва ў гэтай справе, у сувязі з прысутнасьцю міністра ўнутраных спраў у Ліёне", – сказаў Вільям Бурдон нашаму карэспандэнту.

«Канвэнцыя ААН, прынятая 10 сьнежня 1984 году - так званая Нью-Ёрская канвэнцыя супраць катаваньняў – абавязвае дзяржавы, якія яе ратыфікавалі, у тым ліку і Францыю, арыштоўваць падазраваных у катаваньнях, калі яны знаходзяцца на іх тэрыторыі. Гэта якраз сытуацыя, у якой знаходзіцца міністар».

Бурдон патлумачыў, што брытанскія юрысты зьвязаліся зь ім у другой палове дня ў сераду. «Пазоў быў пададзены ў чацьвер у 10.30. Больш хутка зрабіць гэта было цяжка. Справа знаходзіцца ў руках парыскага суда пачынаючы з раніцы чацьвярга. У мяне няма інфармацыі, што парыскі суд абавязаў затрымаць міністра і дапытаць».

Датычна абгрунтаванасьці перададзенага ў суд пазову адвакат кажа наступнае: «Справа вельмі добра дакумэнтаваная, надзвычай дакладная, з абсалютна пераканаўчымі доказамі. Яна не пакідае сумненьняў у тым, што міністар унутраных спраў зьяўляецца асноўнай асобай, адказнай за арганізацыю катаваньняў ў адносінах да апанэнтаў у Беларусі».

Гаворачы пра пэрспэктывы судовага перасьледу міністра Куляшова, Уільям Бурдон адзначыў:

«Барацьба з беспакаранасьцю зьяўляецца вялікай праблемай для міжнароднай супольнасьці. Юстыцыя набывае глябальныя маштабы. Некаторыя краіны гэтаму не падпарадкоўваюцца, і таму доступ да францусккай судовай сыстэмы, ўлічваючы, што Францыя прызнала Нью-Ёрскую канвэнцыю супраць катаваньняў, дае ахвярам спосаб атрымаць доступ да правасудзьдзя і надзею, што асобы, адказныя за злачынствы, трапяць пад суд. Гэта патрабуе палітычнай волі. Патрэбна прымяніць тэхнічныя сродкі для перахопу гэтых падазраваных. Я глыбока шкадую з прычыны ваганьняў парыскага суда, які не рэагуе з той хуткасьцю, якой вымагае сытуацыя».

Брытанская Фірма McCue and Partners, прадстаўляе інтарэсы ахвяраў перасьледу з боку беларускага рэжыму, іх сем’і і грамадзянскую ініцыятыву Free Belarus Now.

Вільям Бурдон (1956) – францускі адвакат, спэцыяліст у крымінальным праве, спэцыялізуецца ў абароне ахвяраў глябалізацыі і злачынстваў супраць чалавечнасьці. Праўнук Эдуара Мішлена, заснавальніка кампаніі «Мішлен».

Сам сябе характарызуе як «абаронца правоў чалавека». У 1995-2000 генэральны сакратар Міжнароднай фэдэрацыі правоў чалавека. Абараняў кітайскіх дысыдэнтаў, ахвяраў генацыду ў Руандзе, актывістаў сацыяльнага змаганьня, ваяўнікоў леварадыкальных рухаў, зьняволеных турмы ў Гуантанама, браў удзел у справе супраць Піначэта.


Гл.таксама:
Брытанскія юрысты пачынаюць глябальны перасьлед Лукашэнкі.

Ваша меркаваньне

Паказаць камэнтары

XS
SM
MD
LG