Лінкі ўнівэрсальнага доступу

logo-print

Міліцыя арыштавала 10 тысяч асобнікаў «Витебского курьера»


Віктар Рамнёў

Віктар Рамнёў

Мінулай ноччу на пад’езьдзе да Віцебску супрацоўнікі ДАІ затрымалі машыну дырэктара «Витебского курьера» Віктара Рамнёва.


Паводле шэф-рэдактара газэты Вадзіма Баршчэўскага, машыну з накладам выданьня на дарозе адсочвалі:

«Спачатку затрымалі адну машыну, якой кіравала журналістка Юлія Канаплёва. Але газэты не знайшлі і склалі два пратаколы — за забруджаны нумар і нібыта пратэрмінаваны часовы талён.

Потым спынілі машыну Віктара Рамнёва, прычым затрыманьне праводзілі супрацоўнікі ДАІ, але кіравалі іхнымі дзеяньнямі невядомыя асобы з „грамадзянскай“ машыны. Аўтамабіль Віктара Рамнёва адправілі на штрафную стаянку, а наклад забралі».

Затрыманьне адбывалася на так званым «Варонаўскім кальцы» за 10 км ад Віцебску. Наклад машыны перавозілі з Смаленску, дзе «Витебский курьер» друкуецца — ён зарэгістраваны як расейскае друкаванае выданьне, але распаўсюджваецца ў Віцебску.

Верагодная прычына арышту накладу — матэрыял, прысьвечаны зьняволенаму старшыню Праваабарончага цэнтру «Вясна» Алесю Бяляцкаму.
XS
SM
MD
LG