Лінкі ўнівэрсальнага доступу

Галадоўніка Каваленку яшчэ й аштрафавалі


Сяргей Каваленка

Сяргей Каваленка

Штрафам памерам 140 тысяч рублёў віцебскага актывіста пакарала судзьдзя Першамайскага райсуду Вольга Іванова.

Сябру Кансэрватыўна-хрысьціянскай партыі БНФ Сяргею Каваленку не ўдалося абвергнуць абвінавачаньне ў нецэнзурнай лаянцы паводле заявы супрацоўнікаў інспэкцыі выкананьня пакараньняў Першамайскага РАУС.

12 студзеня ў Першамайскі суд былі выкліканыя сьведкі-міліцыянты, якія затрымлівалі Сяргея Каваленку і складалі на яго адміністрацыйны пратакол. Ніхто зь іх ня чуў, каб актывіст брыдкасловіў — яны дзейнічалі паводле загаду, які атрымалі ўжо пасьля таго, як з інспэкцыі паступіў рапарт на Каваленку. Міліцыянты адзначылі хіба тое, што ён быў узрушаны, наракаў на несправядлівасьць і адмовіўся падпісаць пратакол.

Перад пачаткам пасяджэньня ў калідоры суду

Перад пачаткам пасяджэньня ў калідоры суду



У судовай залі таксама панавала ўзрушэньне. Падтрымаць Сяргея прыйшлі некалькі дзясяткаў віцебскіх актывістаў — нават давялося прынесьці дадатковыя лавы. Усіх уразіла, як Сяргей схуднеў і зь якой цяжкасьцю гаворыць, хоць на ўваходзе ён гучна выгукнуў «Жыве Беларусь!»

Маці падсуднага, Лідзія Каваленка, уголас абурылася тым, што сын вымушаны трымаць галадоўку, бо яго несправядліва вінавацяць, і судзьдзя Вольга Іванова выдаліла яе з залы.

«Закатавалі сына! Выклікайце хуткую дапамогу, няхай яны правераць! Выклікайце хуткую, я не магу глядзець на яго, у мяне сэрца разрываецца!»

Хуткую дапамогу выклікалі двойчы. Сваякі, якіх не дапусьцілі прысутнічаць пры мэдычным аглядзе, ня вераць высновам лекараў, якія абодва разы пацьвердзілі, што ў чалавека, які галадуе 25-ты дзень, здавальняючы ўзровень цукру ў крыві і нармальны ціск.

Каваленку выклікалі хуткую дапамогу

Каваленку выклікалі хуткую дапамогу



Выйшаўшы з судовай залі, Лідзія Каваленка яшчэ доўга не магла супакоіцца:

«Сын замучаны, як з палону! У мяне сэрца разрывалася ад болю! Ён схуднелы ўвесь, толькі скура ды косьці! Мова замаруджаная... Ён у цяжкім-цяжкім стане».

У такім стане Сяргея Каваленку зноў адправілі ў сьледчы ізалятар. Яго зьмясьцілі пад варту на час сьледзтва па крымінальнай справе, распачатай паводле артыкула 415 «Ухіленьне ад адбыцьця пакараньня».

Каваленку вінавацяць у парушэньнях рэжыму падчас «хатняй хіміі», прысуджанай яму ў 2010 годзе за тое, што 7 студзеня ён вывесіў на гарадзкой навагодняй ёлцы бел-чырвона-белы сьцяг.

Адвакат актывіста Пётар Каваленка зазначыў, што з улікам апошняга прысуду ў крымінальнай справе Сяргея зафіксавана ўжо больш за тры парушэньні рэжыму — хоць і трох было б дастаткова, каб замяніць умоўнае пакараньне на больш жорсткі рэжым утрыманьня. Актывісту пагражае да трох гадоў турэмнага зьняволеньня.

Ён кажа, што будзе працягваць галадоўку пратэсту.

Паказаць камэнтары

XS
SM
MD
LG