Лінкі ўнівэрсальнага доступу

logo-print

Міністэрства прыродных рэсурсаў і аховы навакольнага асяродзьдзя Беларусі накіравала старшыні Менгарвыканкама Мікалаю Ладуцьку ліст, у якім адзначае, што ўчастак пад будаўніцтва гатэля «Пэкін» выдзелены ўнутры парку, а гэта не дазваляе захаваць яго нават часткова.

Мінпрыроды патрабуе максымальна захаваць тэрыторыю парку 40-годзьдзя Кастрычніка пры ўзьвядзеньні гатэля «Пэкін».

У лісьце адзначаецца, што распрацаваны праект дэталёвага плянаваньня тэрыторыі ў межах вуліц Ульянаўская, Першамайская, Пуліхава, Смаленская і Леніна прадугледжваў стварэньне парку імя 40-годзьдзя Кастрычніка агульнай плошчай 7,6 га з дапушчальнай забудаванай да 40%. У складзе гэтага пляна схема забудовы не распрацоўвалася, і не былі вызначаны аб’екты, плянуемыя да разьмяшчэньня ў праектаваных межах. Архітэктурны праект забудовы тэрыторыі на дзяржаўную экалягічную экспэртызу не паступаў, паведамляе БелТА.

Раней па прапанове Мінпрыроды Менгарвыканкам адмяніў будаўніцтва рэстарана на тэрыторыі парку і не дазволіў рух аўтатранспарту.

Грамадзкасьць ўпэўненая, што выдзяленьне зямельнага ўчастка пад «Пэкін» праведзена з парушэньнем рашэньняў дэталёвага пляна. Жыхарам прадстаўлена недастатковая інфармацыя адносна захаваньня парку і забудовы ландшафтна-рэкрэацыйнай тэрыторыі.

Мінпрыроды прапануе правесьці нараду ў Менгарвыканкаме па пытаньні карэктыроўкі месца разьмяшчэньня гатэля «Пэкін» для максымальнага захаваньня парку.

Пасьля таго, як у парку пачалі высякаць дрэвы пад будаўніцтва «Пэкіну», жыхары раёна выступілі з пратэстамі. У звароце да кіраўніка краіны, пад якім 412 подпісаў, менчукі патрабавалі спыніць высечку дрэваў ва ўнікальным парку і працы па ўзьвядзеньні гатэля «Пэкін». А таксама прадставіць грамадзкасьці поўную інфармацыю пра гэты праект. Яны прапанавалі перанесьці гатэльны комплекс на пляцоўку насупраць парку, дзе закансэрваванае будаўніцтва корпуса заводу імя Кірава.

Ваша меркаваньне

Паказаць камэнтары

XS
SM
MD
LG