Лінкі ўнівэрсальнага доступу

logo-print

Тэракт, народны сход і зьбядненьне народу як прыкмета рэвалюцыйнай сытуацыі


Вядомы віцебскі актывіст Барыс Хамайда на сваім заўсёдным месцы ля «сіняга дому».

Вядомы віцебскі актывіст Барыс Хамайда на сваім заўсёдным месцы ля «сіняга дому».

Якую падзею ці зьяву ў Беларусі вы лічыце найбольш важнай у 2011 годзе? Адказваюць грамадзкія актывісты Віцебшчыны.

Віцебскі актывіст кампаніі «Гавары праўду» Сяргей Парсюкевіч лічыць самай значнай зьявай 2011 году падзеньне беларускага рубля:

«У мяне гэты год асацыюецца больш з нэгатывам. Я лічу, што найбольш важна для Беларусі тое, што адбылося ў эканоміцы, у банкаўскай сфэры. Гэта падзеньне рубля. Людзі ад гэтага пакутуюць».

Праявы эканамічнага крызісу ў Беларусі лічыць самай важнай падзеяй году і кіраўнік аршанскага моладзевага аб’яднаньня «Зьвяз» Ігар Казьмярчак:

«Гэта, безумоўна, эканамічны крызіс! Нават выбух у мэтро не прынёс столькі наступстваў, колькі крызіс гэты!»

Беспартыйны апазыцыянэр Барыс Хамайда, распаўсюднік незалежнай прэсы ў Віцебску, менавіта выбух у менскім мэтро лічыць падзеяй і значнай, і знакавай:

«Гэта выбух 11 красавіка і нахабная фальсыфікацыя крымінальнай справы супраць Кавалёва і Канавалава! Гэта апошні званок усім нам: пасьля гэтых падзеяў да кожнай нашай патыліцы прыстаўлены рэвальвэр ката!»

Мікола Шарах, актывіст Свабоднага прафсаюзу полацкага прадпрыемства «Шкловалакно», зазначае, што былі ў мінулым годзе і падзеі, якія можна лічыць аптымістычнымі:

«Я думаю, варта зазначыць, што выйшла на волю большасьць палітвязьняў, якім былі прысуджаны вялікія тэрміны.»

Ірына Яскевіч, аштрафаваная за правядзеньне Народнага сходу ў Віцебску, лічыць гэтую імпрэзу самай важнай падзеяй мінулага году:

«Лічу адной з найважнейшых падзеяў 2011 году ўсё-ткі Народны сход. Бо ўпершыню людзі сабраліся самі, каб наладзіць нейкія кантакты, нейкі дыялёг з чыноўнікамі. Усё ж мы жывем у адной краіне, у нас адны цяжкасьці і радасьці».

Актывіст грамадзянскай кампаніі «Наш дом» з пасёлку Коханава Мікалай Петрушэнка мяркуе, што агульных цяжкасьцяў было больш. І зноў вяртаецца да тэмы эканамічнага крызісу, спадзеючыся, што ён падштурхне беларусаў да актыўных дзеяньняў:

«Я думаю, што ўплывовай падзеяй і зьявай сталася фінансавая крыза, якая абрынулася на Беларусь і абрынула беларускі рубель. Яна прывяла да зьбядненьня народу.А гэта ўжо адна зь першых прыкметаў рэвалюцыйнай сытуацыі — калі ўлада ня можа кіраваць па-старому, як раней — калі ў Лукашэнкі былі грошы. Цяпер варта чакаць праяваў другой прыкметы — калі людзі не захочуць жыць па-старому, жыць у галечы».
XS
SM
MD
LG