Лінкі ўнівэрсальнага доступу

Маці Сяргея Каваленкі рыхтуе зварот да міжнародных праваабарончых структур


Лідзія Каваленка
Лідзія Каваленка

Лідзія Каваленка расказала пра гэта на сходзе віцебскіх актывістаў, ініцыяваным Паўлам Севярынцам.

Прысутныя — прадстаўнікі розных партый, рухаў ды іншых няўрадавых арганізацый — прапанавалі пэўныя захады, каб падтрымаць зьняволенага сябра КХП БНФ Сяргея Каваленку. Ён знаходзіцца ў СІЗА, і ўжо 12-ты дзень галадае на знак пратэсту супраць затрыманьня па крымінальным абвінавачаньні.

Вінавацяць Сяргея Каваленку, які да апошняга затрыманьня адбываў «хатнюю хімію» за вывешаны на навагодняй ёлцы ў 2010 годзе бел-чырвона-белы сьцяг, у парушэньні рэжыму адбываньня пакараньня.

Цяпер супраць яго распачатая й адміністрацыйная справа за хуліганства — нібыта ён абразіў супрацоўнікаў інспэкцыі Першамайскага РАУС. Вынік суду па гэтай справе можа стацца вырашальным: калі яго прызнаюць вінаватым, то будзе зафіксавана яшчэ адно парушэньне ў крымінальнай справе, па якой цяпер вядзецца сьледзтва. Судовае пасяджэньне прызначана на 12 студзеня, і адна з прапановаў віцебскіх актывістаў — гэта масавая падтрымка ў судзе.

Алена Каваленка
Алена Каваленка
Жонка Сяргея, Алена Каваленка, адзначае, што за час галадоўкі ў яго пагоршылася здароўе — гэта было відаць нават звонку падчас мінулага судовага пасяджэньня. Спадарыня Алена зьбіраецца хадайнічаць пра спатканьне зь Сяргеем у СІЗА, каб пераканаць яго спыніць галадоўку. У гэтым яе падтрымлі й іншыя прысутныя.

Актывіст кампаніі «Гавары праўду» Сяргей Парсюкевіч: «Трэба, каб Сяргей ведаў, што мы за яго будзем змагацца незалежна ад таго, галадуе ён ці не. Але галадоўка можа істотна падарваць яго здароўе, бо ў яго і так ёсьць праблемы з сэрцам і зь ціскам».

Маці Сяргея Каваленкі, якога ў Віцебску ўжо лічаць 15-м палітвязьнем, падрыхтавала зварот, які пасьля навагодніх сьвятаў будзе разасланы ў праваабарончыя арганізацыі, замежныя амбасады і АБСЭ. Яна лічыць, што жыцьцё сына ў небясьпецы:

Лідзія Каваленка: «Я шчыра баюся, што ў СІЗА яго могуць проста забіць. Ён выглядае хворым, яму неабходная мэдычная дапамога, хаця сам ён імкнецца трымацца годна і цьвердзіць, што пачуваецца добра».

Да дня чарговага суду над актывістам ягоныя аднадумцы распрацавалі і пэўны плян інфармацыйнай падтрымкі, і сабралі трохі грошай для сям’і Каваленкаў, дзе гадуюцца двое непаўналетніх дзетак, а жонка знаходзіцца ў адпачынку па доглядзе за малодшай шасьцімесячнай дачкой.

Падчас сходу.
Падчас сходу.


Нарада, якую ініцыяваў Павал Севярынец, прайшла ў дзень ягонага 35-годзьдзя. Палітык прыехаў у кароткі адпачынак з «хіміі». Таму не абышлося без падарункаў і віншаваньняў: Паўлу падарылі тэрмас, каб у яго заўжды была цёплая гарбата, і кубак для яе. Адмысловы падарунак Сяргей Парсюкевіч перадаў ад кампаніі «Гавары праўду» — гэта зборнік лістоў і вершаў Уладзімера Някляева, напісаных у СІЗА КДБ, з аўтографам і пажаданьнямі ад аўтара.

Сяргей Парсюкевіч перадае Паўлу Севярынцу пажаданьні ад Уладзімера Някляева.
Сяргей Парсюкевіч перадае Паўлу Севярынцу пажаданьні ад Уладзімера Някляева.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG