Лінкі ўнівэрсальнага доступу

Дазволу на канваіраваньне Бяляцкага да хворага бацькі дагэтуль няма


Алесь Бяляцкі

Алесь Бяляцкі

Жонка праваабаронцы Алеся Бяляцкага Натальля Пінчук працягвае спробы атрымаць дазвол на сустрэчу мужа зь ягоным цяжкахворым бацькам, які, паводле дактароў, у любы момант можа пайсьці з жыцьця.

Гэтым Натальля Пінчук займаецца з панядзелка, 19 сьнежня, але пакуль марна. Хаця ў Першамайскім судзе Менска далі дазвол на сустрэчу, але ў Дэпартамэнце выкананьня пакараньняў МУС ня вырашылі пытаньне аб канваіраваньні Алеся Бяляцкага з Жодзінскага сьледчага ізалятара да хворага бацькі ў Менск.

Натальля Пінчук

Натальля Пінчук

Натальля Пінчук: «У Дэпартамэнце выкананьня пакараньняў мне назвалі імя супрацоўніка, які нібыта адказвае за арганізацыю канваіраваньня вязьняў на сустрэчу са сваякамі ў падобных выпадках. Гэта Васіль Рабчон. Але самога яго ў ДВП не аказалася, а тэлефон ягоны не даюць. Я пакінула ў дэпартамэнце свае кантакты і чакаю званку ад гэтага чалавека. Таксама сёньня мой адвакат пакінула заяву на канваіраваньне і сустрэлася з выканальнікам абавязкаў начальніка Дэпартамэнту Сяргеем Працэнкам. Той працягвае казаць, што дазволу, які выдаў суд, недастаткова для арганізацыі спатканьня і нічога пэўнага не абяцае. Сытуацыя тупіковая. Нас штурхаюць па замкнёным коле і ніхто ня хоча браць на сябе адказнасьць. Я ўжо не выключаю, што спатканьня не дазволяць ня толькі зараз, пакуль бацька Алеся яшчэ жывы, але могуць не адпусьціць Алеся і потым, калі здарыцца горшае».

Кіраўнік праваабарончага цэнтру «Вясна» Алесь Бяляцкі асуджаны на 4,5 году зьняволеньня паводле абвінавачаньня ў нясплаце падаткаў зь вялікіх прыбыткаў. Алесь Бяляцкі сваёй віны ў судзе не прызнаў. Паводле праваабаронцы, грошы, якія прыходзілі з-за мяжы на ягоны рахунак, ішлі на дапамогу рэпрэсаваным. З 4 жніўня Алеся Бяляцкага трымаюць за кратамі.

19 сьнежня да бацькі праваабаронцы выклікалі хуткую дапамогу, лекары не выключаюць, што хвароба Віктара Бяляцкага неўзабаве можа прывесьці да сьмерці.
XS
SM
MD
LG