Лінкі ўнівэрсальнага доступу

Выбары ў Расеі: "Мядзьведзь" можа страціць канстытуцыйную большасьць


Расея рыхтуецца да выбараў у Дзяржаўную Думу, якія адбудуцца ў нядзелю. Партыя "Адзіная Расея" разьлічвае захаваць цяперашнюю большасьць у парлямэнце.

Як паведамляе карэспандэнт Радыё Свабода ў Маскве, колькасьць жадаючых ісьці на выбары, паводле апытаньняў, імкліва зьмяншаецца.

Нягледзячы на падзеньне папулярнасьці кіруючай партыі Адзіная Расея, аналітыкі кажуць, што яна, хутчэй за ўсё, захаваць сваё большасьць у Думе, але ня выключана, што можа страціць цяперашнія дзьве траціны кваліфікаванай большасьці, што дазваляе ім неабмежавана зьмяняць Канстытуцыю.

Крытыкі Адзінай Расеі называюць яе "партыяй злодзеяў і ашуканцаў".

Крытыкі Адзінай Расеі (яе сымбалем зьяўляецца мядзьведзь) называюць яе "партыяй злодзеяў і ашуканцаў". Аналітыкі адзначаюць відавочныя прыкметы росту грамадзкай незадаволенасьці ў Расіі, якая была ва ўладзе прэм'ер-міністра Уладзіміра Пуціна за больш чым дзесяцігодзьдзе.

Выкарыстаньне Крамлём і яго камандай так званага «адміністрацыйнага рэсурсу» павінна забясьпечыць Адзінай Расеі, па меншай меры, простую большасьць галасоў, лічаць аналітыкі.

Кіраўнік Санкт-Пецярбургскага фонду палітыкі Міхаіл Вінаградаў кажа:

Дзяржаўная Дума не зьяўляецца ключавым органам для прыняцьця рашэньняў

"Я думаю, што шанцы Адзінай Расеі набраць канстытуцыйную большасьць (дзьве траціны) галасоў ўпалі даволі рэзка, але, зь іншага боку, гэта наўрад ці моцна зьменіць сытуацыю. Перш за ўсё, гэта таму, што Дзяржаўная Дума не зьяўляецца ключавым органам для прыняцьця рашэньняў і фармаваньня палітыкі. Па-другое, Адзіная Расея ўсё ж здолее сфармаваць кааліцыю ".

Мікалай Пятроў палітычны аналітык Маскоўскага цэнтра Карнэгі:

"Ёсьць шмат розных спосабаў, каб зрабіць іх (партыі) ляяльнымі. Адным з іх зьяўляецца велізарны фінансавы кантроль. Паколькі ў нас няма падзелу бізнэсу і палітычнай улады, то ні адна палітычная партыя ня можа разьлічваць на атрыманьне грошай ад любога бізнэсу без дазволу Крамля, што робіць магчымым для Крамля ня толькі кантраляваць гэтыя палітычныя партыі ў цэлым, але змагацца зь імі на ўсіх этапах кампаніі, таму што гэта фінансавая падтрымка можа быць абрэзана ў любы час. "

У тэлезвароце да выбаршчыкаў сёньня прэзыдэнт Мядзведзеў настойваў, што ў Расеі палітычныя партыі карыстаюцца "свабоднай і роўнай канкурэнцыяй".

Аднак паказчыкам нэрвовага стаўленьня да выбараў ёсьць узбуджэньне на гэтым тыдні пракуратурай справы супраць адзінага незалежнага цэнтру маніторынгу выбараў «Голас», які атрымлівае заходняе фінансаваньне і ўжо зафіксавала тысячы парушэньняў выбарчай працэдуры.

Былы віцэ-прэм'ер Барыс Нямцоў і былы прэм'ер-міністр Міхаіл Касьянаў заклікалі сваіх прыхільнікаў да байкоту выбараў, якія яны называюць "незаконнымі".

З іншага боку, блёгер і змагар з карупцыяй Аляксей Навальны, а таксама былы намесьнік міністра энэргетыкі Уладзімір Мілаў заклікалі сваіх прыхільнікаў галасаваць за якую заўгодна партыю, акрамя Адзінай Расеі, каб зьнізіць прадстаўніцтва ў парлямэнце кіруючай партыі.
XS
SM
MD
LG