Лінкі ўнівэрсальнага доступу

«Мяне фармулёўка пра расейскі альтруізм увесь час зьдзіўляе»


Міхал Залескі

Міхал Залескі

Чаму Аляксандар Лукашэнка спыніў намеры ўраду праводзіць больш рынкавую эканамічную палітыку? Ці спадзяецца афіцыйны Менск зноў на дапамогу Расеі і ці бескарысьлівая гэтая дапамога? Чаму беларускі кіраўнік баіцца эканамічных рэформаў?


На гэтыя пытаньні адказвае эканаміст Міхал Залескі.

— Аляксандар Лукашэнка фактычна забараніў ураду праводзіць рынкавыя перамены і нават прыгразіў адстаўкай тым чыноўнікам, што ставяць пад сумнеў дагэтулешнюю эканамічную палітыку. Пэўны час гэтая палітыка мела посьпех, але скончылася ў 2011 годзе 100-працэнтнай інфляцыяй і трохразовай дэвальвацыяй… Дзеля чаго яе працягваць?

— Кожны прыём, спосаб, мэтад — абмежаваны сам у сабе, у сваіх магчымасьцях. Я магу вымераць нешта на пальцах — пакуль мне трэба рабіць нешта прымітыўнае. Але потым ужо спатрэбяцца дакладныя вымяральныя прыборы. Таксама і тут. Можна было пэўны час выкарыстоўваць адміністратыўны рэсурс. Але калі ён ужо вычарпаны і больш нічога не дае, то колькі ні цісьні на гэты лімон, ліманаду зь яго ўжо ня зробіш.

— Тыя эканамічныя посьпехі, якія былі ў Беларусі, былі дасягнутыя ня толькі адміністратыўным рэсурсам, але і дапамогай Расеі, якая вылівалася ў мільярды даляраў штогод. Можа, зараз Лукашэнка разьлічвае зноў на гэтую падтрымку і некаторыя апошнія навіны нібыта гавораць якраз пра гэта?
Рабіць рэформы — гэта дастаткова балюча, як усялякае лячэньне. І той, хто лечыцца, павінен быць гатовы цярпець. А зараз людзі скажуць — «дзеля каго цярпець?»

— Ведаеце, мяне фармулёўка пра расейскі альтруізм, пра іхнюю дабрыню ўвесь час зьдзіўляе. Даўно ўжо — гадоў тысяч дзесяць, як скончыўся першабытны лад — ніхто нікому нічога бясплатна не дае. Расея нешта выгадвала, нешта купляла за свае датацыі, нешта атрымлівала ўзамен.

Значыць, зараз Лукашэнка зноў нешта паабяцаў, калі яны зноў даюць грошы. І нам, грамадзтву, цалкам незразумелыя ўмовы гэтых пакуль толькі абяцаных крэдытаў і зьніжак па газе. Давайце дажывем да 1 студзеня і ўбачым, што ў нас ёсьць на лічыльніку і што Расея ўзяла ў выніку ад нас.

— Ці ня ёсьць у жаданьні Лукашэнкі адмовіцца ад тых мінімальных рынкавых крокаў, што прапаноўваў урад, сярод іншага і боязь, што эканамічная лібэралізацыя можа з часам прывесьці і да большых палітычных свабодаў?

— Як майстар маніпуляваньня масамі Лукашэнка зразумеў, што ўспрымальнасьць беларусаў да зьменаў на сёньня вычарпаная. Гэта як доктар, які ня хоча чапаць хворага — маўляў, няхай сам неяк дажывае. Бо рабіць рэформы — гэта дастаткова балюча, як усялякае лячэньне. І той, хто лечыцца, павінен быць гатовы цярпець. А зараз людзі скажуць — «дзеля каго цярпець?»
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

Паказаць камэнтары

XS
SM
MD
LG