Лінкі ўнівэрсальнага доступу

Разьвітаньне з Валерыем Раеўскім адбудзецца 22 лістапада


Валеры Раеўскі

Валеры Раеўскі

Разьвітаньне з народным артыстам Беларусі, рэжысэрам-пастаноўшчыкам Нацыянальнага акадэмічнага тэатру імя Янкі Купалы Валерыем Раеўскім адбудзецца ў аўторак 22 лістапада.

Жалобная імпрэза пройдзе ў менскім Доме літаратара (вуліца Фрунзэ, 5). Пачатак грамадзянскай паніхіды – а 12.30.

Валеры Раеўскі памёр 19 лістапада.

Раеўскі працаваў у Купалаўскім тэатры ад 1967 году. Ён паставіў больш за 35 спэктакляў па беларускай і замежнай драматургіі.

Сярод іх “Што той салдат, што гэты” па Брэхту, “Бура” Шэксьпіра, “Рэвізор” Гогаля, “ Тры сястры” Чэхава, “Запіскі з падпольля” Дастаеўскага, “Лес” Астроўскага.

Спэктаклі паводле твораў беларускіх драматургаў: “Трыбунал” і “Пагарэльцы” Андрэя Макаёнка, “Брама неўмяручасьці” Кандрата Крапівы, “Апошні шанец” Васіля Быкава, “Чалавек зь легенды” Яўгена Шабана, “Парог”, “Радавыя”, “Апошні журавель” Аляксея Дударава, “Мудрамер” Міколы Матукоўскага.

У 1976 годзе Раеўскаму было прысвоена ганаровае званьне “Заслужаны дзеяч мастацтваў БССР”, а ў 1998 годзе званьне “Народны артыст Рэспублікі Беларусь”. У 2004 годзе ўзнагароджаны Ордэнам Францыска Скарыны.

Валеры Раеўскі зьўяляўся прафэсарам Беларускай акадэміі мастацтваў.
XS
SM
MD
LG