Лінкі ўнівэрсальнага доступу

МУС у адказе ўдзельнікам Народнага сходу ня згадвае слова «палітвязьні»


Уладзімер Шанцаў, старшыня магілёўскага Народнага сходу.

Уладзімер Шанцаў, старшыня магілёўскага Народнага сходу.

Міністэрства ўнутраных спраў Беларусі даслала адказ на патрабаваньне ўдзельнікаў магілёўскага Народнага сходу вызваліць палітвязьняў.

У лісьце за подпісам намесьніка начальніка галоўнага ўпраўленьня аховы правапарадку й прафіляктыкі Кубракова ня згадваецца паняцьце «палітвязьні». Пры гэтым адзначаецца, што вызваленьне асуджаных урэгулявана артыкуламі Крымінальнага кодэксу «Ўмоўна-датэрміновае вызваленьне», «Амністыя» і «Памілаваньне».

У лісьце таксама адзначаецца, што для выкананьня пакараньняў Міністэрства ўнутраных спраў кіруецца абвінаваўчым прысудам судоў.

Адказ зь міністэрства атрымаў старшыня Народнага сходу Ўладзімер Шанцаў.

Шанцаў: «Зразумела, чаму ня згадваецца такое слова, як „палітвязьні“. У нас жа, як сьцьвярджае ўлада, іх няма. Але ў лісьце гаворыцца пра межы кампэтэнцыі, дык вось такі адказ — прыклад некампэтэнтнасьці. Урад адправіў патрабаваньне ў орган, які не кампэтэнтны вырашаць такія пытаньні. Гэта наагул стыль працы ўраду — некампэтэнтнасьць. У лісьце нас папярэджваюць, што ня варта парушаць закон „Аб масавых мерапрыемствах“. Мы па пытаньнях масавых мерапрыемстваў не зьвярталіся да іх. Ну, зразумела, што ім непрыемна, што людзі сабраліся й ад іх нечага запатрабавалі. Таму яны адпісалі й прыгразілі».

Патрабаваньне вызваліць і рэабілітаваць палітвязьняў удзельнікі Сходу вызначылі як асноўнае. Сярод палітычных патрабаваньняў было яшчэ й правядзеньне свабодных выбараў прэзыдэнта й парлямэнту. На гэта пакуль адказу няма.

Адказ зь Міністэрства ўнутраных спраў — другі, які атрымліваюць удзельнікі Народнага сходу. Першы яны атрымалі пры канцы кастрычніка з Нацыянальнага банку. У лісьце тлумачылася, чым выкліканыя цяжкасьці ў эканоміцы. Пра канкрэтны плян дзеяньняў па іх вырашэньні ў адказе не гаварылася.

Народны сход адбыўся 8 кастрычніка. У ім узялі ўдзел, паводле арганізатараў, больш за 150 чалавек.

Паказаць камэнтары

XS
SM
MD
LG