Лінкі ўнівэрсальнага доступу

У Бабруйску затрыманьні за «Дзяды»


19:30 У Бабруйску затрымалі чатырох удзельнікі акцыі, якая праводзілася ў памяць ахвяраў палітычных рэпрэсій.

Грамадзкія актывісты разам зь іншымі вернікамі выйшлі з царквы, дзе адбывалася малітва за нявінна закатаваных. Са сьвечкамі ў руках яны накіраваліся на плошчу Перамогі, дзе рэпрэсаваным усталяваны помны знак. На падыходах да плошчы людзей атачылі супрацоўнікі міліцыі і заштурхалі ў аўтобус.

Актывістаў адвезьлі ў пастарунак на вуліцы Гогаля і загадалі выключыць мабільныя тэлефоны.

Ля пастарунку зьбіраюцца сваякі й сябры затрыманых.

20:30 Алена Тоўсьцік, Дзьмітры Тоўсьцік, Арцём Мархасёў ды Марыя Іванова ў пастарунку на вуліцы Гогаля прабылі гадзіну. На ўсіх склалі пратаколы адміністрацыйнага правапарушэньня. Паводле пратаколаў, усіх вінавацяць ва ўдзеле ў несанкцыянаваным мерапрыемстве, якім актывісты прыцягвалі ўвагу грамадзян.

Вінаватымі актывісты сябе не прызнаюць.

Алена Тоўсьцік: «Мы набылі сьвечкі ў царкве, запалілі іх і зьбіраліся ісьці да памятнага знаку рэпрэсаваным на плошчы Перамогі. Не пасьпелі адысьці ад царквы, як да нас падбег чалавек у цывільным з камэрай. Пачаў выпытваць, куды мы ідзем. Потым дарогу перагарадзіў міліцэйскі аўтобус. Нас гвалтам зацягнулі ў яго й даставілі ў пастарунак. Дужа шмат было міліцыі, калі затрымлівалі. Кіраваў затрыманеньнем маёр Малахаў. У чым наша віна, мы ня ведаем. Мы проста зьбіраліся адзначыць сёньняшні дзень памінаньня продкаў».

Што будзе далей са складзенымі пратаколамі, актывістам міліцыянты не сказалі. Усе актывісты цяпер наволі.


XS
SM
MD
LG