Лінкі ўнівэрсальнага доступу

«Паводле такіх індэксаў Куба можа быць вышэй за Швэйцарыю»


Міжнародны дасьледчы інстытут "Legatum" агучыў свой рэйтынг дабрабыту краінаў сьвету, паводле якога Беларусь заняла 50-е месца. Незалежныя экспэрты лічаць, што некаторыя беларускія паказчыкі гэтага рэйтынгу, магчыма, не зусім адпавядаюць рэальнасьці.

Напрыклад, у краіне шмат людзей з вышэйшай адукацыяй, але яе ўзровень даволі нізкі, і беларускія дыплёмы не прызнаюцца нідзе ў сьвеце.

Былы міністар працы, незалежны сацыёляг Аляксандар Сасноў лічыць, што да такіх рэйтынгаў трэба ставіцца з пэўнай доляй умоўнасьці. У паняцьце «дабрабыту» ў такіх індэксах часам уключаюцца рэчы, якія ўласна да матэрыяльнага дабрабыту ня маюць непасрэднага дачыненьня.

Сасноў: «Там шмат якія складнікі ўключаюць тое, што было назапашана яшчэ ў савецкія часы. Калі нафтадаляраў у СССР было шмат і іх не было куды падзець, таму і засталіся высокія паказчыкі. Узяць, напрыклад, Кубу. Там есьці людзям няма чаго — але мэдыцына вельмі высокая.

Што тычыцца такіх паказчыкаў, як «грамадзкі капітал» ці «адукацыя», то іх можна падвышаць. Напрыклад, у нас вельмі высокая колькасьць людзей з вышэйшай адукацыяй. Але дзе прызнаюцца беларускія дыплёмы? Нідзе. Вось і ўвесь адказ».

Прыклад Кубы пры ацэнцы гэтага рэйтынгу ўзгадаўся і аглядальніку газэты «Белорусы и рынок» Кастусю Скуратовічу, які піша на сацыяльныя тэмы. Спадар Скуратовіч лічыць, што пры складаньні такіх індэксаў часам дзейнічае прынцып «сярэдняя тэмпэратура ў бальніцы».

Скуратовіч: «Паводле такіх індэксаў Куба можа быць вышэй за Швэйцарыю, бо там добрая і бясплатная сыстэма мэдыцыны плюс бясплатная адукацыя і гэтак далей. Як ставіцца да такіх рэйтынгаў? Складаюць даўжыню рук, ног, носа, вушэй і атрымліваюць нейкую сярэднюю велічыню?

Калі браць нашу краіну, то выявіцца, што валавы ўнутраны прадукт, які нібыта вельмі хутка падвышаўся, насамрэч у 2011 годзе аказаўся напаўпусты. Чаму ў нас моладзь пнецца ў ВНУ? Бо шмат хто зь іх ня можа сябе рэалізаваць, ня можа знайсьці сабе працу. Таму бацькі накіроўваюць іх у інстытут, аддаюць свае грошы, каб 5 гадоў галава не балела, куды прыстроіць дзіця».

Падобнае меркаваньне выказаў і экспэрт Эўрапейскай рады ў пытаньнях замежных адносінаў Эндру Ўільсан. Сп. Уільсан зьяўляецца аўтарам кнігі «Беларусь: Апошняя эўрапейская дыктатура», якая толькі што выйшла ў выдавецтве «Yale University Press».

Уільсан: «Я агаломшаны гэтым рэйтынгам. У гэтым рэйтынгу па-мойму куча фальшывай статыстыкі, уключаючы афіцыйныя паведамленьні пра рост валавога ўнутранага прадукту, якія не выклікаюць даверу. Альтэрнатыўная статыстыка, праўдападобна, больш вартая даверу. Лукашэнка заявіў на ўвесь сьвет перад выбарамі ў сьнежні летась пра сярэднюю месячную зарплату ў 500 даляраў. Ён гэтай мэты, магчыма, і дасягнуў. Але потым, пасьля трохразовай дэвальвацыі ў 2011 годзе, зарплата ўпала да 200 даляраў».

Экспэрты лічаць, што па выніках 2011 году, калі Беларусь напаткаў сур'ёзны эканамічны крызіс, месца краіны ва ўсясьветным рэйтынгу дабрабыту істотна панізіцца.

Паказаць камэнтары

XS
SM
MD
LG