Лінкі ўнівэрсальнага доступу

Кастрычніцкая плошча — суд — турма


Суд Цэнтральнага раёну Менску пакараў пяцёх удзельнікаў акцыі ў падтрымку палітзьняволеных штрафам і адміністрацыйнымі арыштамі на тэрмін ад 7 да 10 сутак. Іх затрымалі напярэдадні на Кастрычніцкай плошчы Менску і зьвінавацілі ва ўдзеле ў несанкцыянаваным масавым мерапрыемстве. Асуджаныя не прызналі сваёй віны.

Затрыманых удзельнікаў акцыі салідарнасьці з палітвязьнямі судзілі асобна: Алега Рагоўскага — судзьдзя Шабуня, Алега Рахоўскага — судзьдзя Есьман, Аляксандра Салдаценку — судзьдзя Хадановіч, Сяргея Казакова — судзьдзя Бычко. Менавіта яна асудзіла былога палітвязьня на 10 сутак турмы, астатнія атрымалі па 7 сутак зьняволеньня. Галіну Паддубка судзьдзя Алена Семак пакарала штрафам у памеры 700 тысяч рублёў.

Адзін з актывістаў «Эўрапейскай Беларусі» Аляксей Цёплы: «Людзі выходзяць на плошчу, каб выказаць сваю грамадзянскую пазыцыю. А ўлады чыняць проста „бязьмежжа“. І гэтыя суткі толькі пацьвярджаюць, што ўлады парушаюць усе магчымыя законы і перадусім Канстытуцыю — гэта вяршыня „бязьмежжа“. Таму нашы акцыі патрэбныя, каб паказаць, што мы не баімся, што ўлады не ўсёмагутныя, як ім падаецца».
Нашы акцыі патрэбныя, каб паказаць, што мы не баімся, што ўлады не ўсёмагутныя, як ім падаецца.

Затрыманых удзельнікаў акцыі даставілі ў суд Цэнтральнага раёну з турмы на вуліцы Акрэсьціна, дзе пратрымалі мінулую ноч. Разам з чатырма актывістамі, якія выйшлі на плошчу з партрэтамі зьняволеных, у міліцэйскай машыне была дастаўлена і 51-гадовая Галіна Паддубка. Яе затрымалі, бо жанчына паспрабавала выказаць сваё меркаваньне пра тое, што бачыла на Кастрычніцкай плошчы.

Гаворыць намесьнік старшыні «Маладога фронту» Мікола Дземідзенка, які прыйшоў у суд падтрымаць актывістаў:

«Людзям працягваюць даваць адміністрацыйныя арышты, гэта значыць, што ўлада ня мае намеру адмаўляцца ад такога сродку пакараньня — зьмяшчэньня людзей у непрымальныя ўмовы жыцьця на Акрэсьціна. Словам — усё працягваецца, і гэта не нармальна».

Гэтаксама як і падчас суду над Максімам Вінярскім, асуджаных за акцыю салідарнасьці суправаджала ўзмоцненая ахова зь міліцыянтаў і невядомых сілавікоў у цывільным. Гэтаксама яны адмаўляліся называцца, груба перашкаджалі працаваць журналістам, забаранялі праваабаронцам і актывістам праходзіць у залю паседжаньняў. Аднак і ў такіх абмежаваных умовах салідарная падтрымка для асуджаных і палітвязьняў надзвычай важная, кажа былы палітвязень Васіль Парфянкоў:

«У турме я атрымліваў нашы незалежныя беларускія газэты. І калі чытаў, што людзі моляцца за нас каля Чырвонага касьцёла, што выходзяць на вуліцу, то гэта надавала сілаў усё перажыць і не зламацца. Таму акцыі салідарнасьці будуць праходзіць і надалей. Нас не запалохаць ні затрыманьнямі, ні прысудамі. Хопіць баяцца — мы адзіны народ, і разам мы пераможам».

А 19:00 на Кастрычніцкай плошчы Менску мае адбыцца чарговая акцыя ў падтрымку палітвязьняў. Актывісты «Эўрапейскай Беларусі» заклікалі неабыякавых людзей на знак салідарнасьці з палітвязьнямі выходзіць на Кастрычніцкую плошчу штодня.
XS
SM
MD
LG