Лінкі ўнівэрсальнага доступу

Мікола Шарах будзе судзіцца з прадпрыемствам "Полацак-Шкловалакно"


Актывіст Свабоднага прафсаюзу, памочнік майстра цэху № 7 патрабуе, каб на прадпрыемстве ўлічвалася і аплочвалася дадатковая праца, якую робяць рабочыя. З пазовам да ААТ "Полацак-Шкловалакно" ён зьвярнуўся ў Полацкі гарадзкі суд. Разгляд працоўнай спрэчкі распачнецца 1 лістапада.

Тое, што неабходна падвысіць заробак, актывісты Свабоднага прафсаюзу двойчы абмяркоўвалі на пасяджэньнях камісіі па індывідуальных працоўных спрэчках. Яны прапаноўвалі павялічваць тарыфную стаўку на 30%. Але камісія адмовіла — палічыла, што даплаты за працу звыш нормы не абавязковыя.

Сьледам за Міколам Шарахам заяву ў суд рыхтуе старшыня суполкі свабоднага прафсаюзу ААТ "Полацак-Шкловалакно", апэратар цэху № 7 Віктар Стукаў.

"18 кастрычніка Свабодны прафсаюз правёў апытаньне апэратараў вытворчасьці бесьперапыннага шкловалакна зьмены цэху № 7. Было апытана 20 апэратараў, якія працуюць на другой печы. На пытаньне "Колькі апэратар ПНСВ павінен зарабляць пры сёньняшніх цэнах?" адказы былі — ад 3 да 6 мільёнаў беларускіх рублёў. Сярэдняя велічыня зарплаты, якую апэратары лічаць справядлівай на сёньняшні дзень, — 4 350 000 беларускіх рублёў", — заявіў Стукаў "Свабодзе".

Спадары Стукаў і Шарах распавялі, што заробак на прадпрыемстве рэгулюецца калектыўнай дамовай. Сёлета ў жніўні адміністрацыя прадпрыемства не запрасіла на падпісаньне гэтага дакумэнту прадстаўнікоў Свабоднага прафсаюзу. У дамове зафіксавана, што заробак на ААТ "Полацак-Шкловалакно" павінен быць ня меншы за 300% ад мінімальнага спажывецкага бюджэту — гэта каля 1 800 000 рублёў. Актывісты незалежнага прафсаюзу лічаць, што іх адмыслова не дапусьцілі да падпісаньня калектыўнай дамовы, каб легітымізаваць заробкі, далёкія ад 500 даляраў, якія некалі абяцаў Аляксандар Лукашэнка.
XS
SM
MD
LG