Лінкі ўнівэрсальнага доступу

Адміністрацыя магілёўскай калёніі выяўляе падвышаную ўвагу да здароўя палітзьняволенага Зьмітра Бандарэнкі. Экс-кандыдату на прэзыдэнта Міколу Статкевічу на асабісты рахунак у шклоўскай турме не дайшлі дзьве пэнсіі. Маладафронтавец Эдуард Лобаў сустрэўся з маці ў турме «Ваўчыныя норы». Былы кандыдат на прэзыдэнта Андрэй Саньнікаў і лідэр «Маладога фронту» Зьміцер Дашкевіч працягваюць адбываць карантын у турмах Бабруйску і Глыбокага.

Палітзьняволены Зьміцер Бандарэнка даслаў з магілёўскай турмы адразу чатыры лісты, у якіх паведамляе, што адміністрацыя разам зь лекарамі турэмнага шпіталя пачалі надзвычай цікавіцца станам ягонага здароўя, паведаміла «Свабодзе» жонка Вольга Бандарэнка:

«Піша, што апошнім часам адміністрацыя калёніі і мэдыкі настойліва распытваюць пра стан ягонага здароўя. Ён кажа, што пяць месяцаў пасьля апэрацыі ня тое што не цікавіліся і не дапамагалі, а рабілі ўсё горш — і цяжкасьці цягаў, і па лесьвіцах хадзіў — наадварот, толькі пагаршалі становішча. А цяпер рэкамэндуюць садзіцца і г.д. Кажа, што ня ведае, з чым гэта зьвязана».

Былы кандыдат на прэзыдэнта Андрэй Саньнікаў працягвае адбываць карантын у камэры-адзіночцы бабруйскай турмы. Днямі яго наведаў адвакат, празь якога палітвязень прасіў перадаваць яму болей літаратуры, паведаміла «Свабодзе» жонка Ірына Халіп:

«Да яго даходзяць газэты, ён атрымлівае лісты, якія яго вельмі падтрымліваюць. І яшчэ ён прасіў дасылаць часопісы, кнігі, і вось я зараз дасылаю. Бо разумею, што сядзець у чатырох сьценах увесь час — гэта можна з глузду зьехаць з-за таго, што нічога не зьмяняецца і няма чаго рабіць».

Падчас сустрэчы яшчэ аднаго экс-кандыдата на прэзыдэнта Міколы Статкевіча з бацькам Віктарам Статкевічам стала вядома, што на асабістым рахунку палітвязьня не хапае дзьвюх ягоных пэнсіяў, паведаміла жонка Міколы Статкевіча Марына Адамовіч:
Калі бліжэйшым часам грошы ня зьявяцца, то будзем судзіцца — дзе падзелі пэнсіі Міколы Статкевіча.

«Грошы на рахунку Мікалая ёсьць, у тым ліку тыя, што людзі пералічвалі яму да дня народзінаў. Але Мікола пра іх ня ведае, бо яму не паведамляюць. Дзьве пэнсіі Міколы дзесьці зьніклі, бо іх пачалі пераводзіць у калёнію без маёй, ягонай ці яшчэ чыёй-небудзь волі, яшчэ са жніўня. Але першы перавод зьявіўся толькі ў кастрычніку. Калі бліжэйшым часам грошы ня зьявяцца, то будзем судзіцца — дзе падзелі пэнсіі Міколы Статкевіча».

Доўгатэрміновае спатканьне з маці ў івацэвіцкай турме «Ваўчыныя норы» цягам трох мінулых дзён атрымаў маладафронтавец Эдуард Лобаў. Маці Марына Лобава паведаміла «Свабодзе», што на сына перасталі ціснуць у справе напісаньня прашэньня аб памілаваньні. Ён таксама ня скардзіўся на ўмовы ўтрыманьня. Але з турмы маці вярнулася ў прыгнечаным стане:

«Канечне, я задаволеная, што пабачыла яго, што ён добра выглядае. Але вельмі цяжка было яго пакідаць, калі яго вялі за краты. Там такія дзьверы закратаваныя, і яго туды за гэтыя дзьверы павялі. Гэта вельмі прыгнятае маральна, асабліва калі ведаеш, што ён ні ў чым не вінаваты. Калі ведаеш, што наступнае спатканьне ня хутка, толькі вясной. Туды я ехала з добрым настроем, шчасьлівая была, што пабачу, а цяпер вяртаюся ў прыгнечаным стане і з разьбітым настроем».

Паплечнік Эдуарда Лобава, лідэр «Маладога фронту» Зьміцер Дашкевіч пасьля пераводу ў калёнію ў Глыбокім застаецца ў камэры-адзіночцы. Чакаецца, што ў наступным месяцы яму дазволяць сустрэчу з бацькам.
Зьміцер Бандарэнка
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.

У 1984 г. скончыў Інстытут фізычнай культуры.

У 1995–1996 гг. працаваў на незалежным Радыё 101.2 FM, зачыненым уладамі.

Адзін з заснавальнікаў грамадзянскай ініцыятывы «Хартыя-97», каардынатар грамадзянскай кампаніі «Эўрапейская Беларусь».

У часе прэзыдэнцкіх выбараў 2010 г. быў актывістам штабу кандыдата на прэзыдэнта Андрэя Саньнікава. Быў арыштаваны 20 сьнежня ва ўласнай кватэры і зьмешчаны ў СІЗА КДБ. Першапачаткова ў дачыненьні да яго было высунутае абвінавачваньне па арт. 293 КК (масавыя непарадкі), які прадугледжвае пакараньне да 15 гадоў пазбаўленьня волі, аднак 4 красавіка яно было перакваліфікавана на больш мяккае.

Зьміцер Бандарэнка абвінавачваецца па ч. 1 артыкулу 342 Крымінальнага кодэксу (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх). Артыкул прадугледжвае пакараньне штрафам, або арыштам на тэрмін да шасьці месяцаў, ці абмежаваньнем волі на тэрмін да трох гадоў, або пазбаўленьнем волі на той жа тэрмін.
Андрэй Саньнікаў
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.

У 1995-1996 гг. — намесьнік міністра замежных спраў Беларусі. Пакінуў гэтую пасаду ў лістападзе 1996 год на знак пратэсту супраць правядзеньня рэферэндуму. У лістападзе 1997 году стаў стваральнікам і міжнародным каардынатарам грамадзянскай ініцыятывы «Хартыя’97».

У 2008 годзе ініцыяваў грамадзянскую кампанію «Эўрапейская Беларусь».

Ляўрэат міжнароднай прэміі імя Бруна Крайскага ў галіне абароны правоў чалавека (2005 г.).

Кандыдат у прэзыдэнты Рэспублікі Беларусь на выбарах-2010.
Мікола Статкевіч
Нарадзіўся 12 жніўня 1956 году ў вёсцы Лядна Слуцкага раёну Менскай вобласьці ў сям'і настаўнікаў.

1978 г. Скончыў Менскую вышэйшую інжынэрную зэнітна-ракетную вучэльню.

1986 г. Абараніў кандыдацкую дысэртацыю.

Працаваў выкладчыкам Менскай вышэйшай інжынэрнай зэнітна-ракетнай вучэльні.

Люты 1991 г. На знак пратэсту супраць падзей у Вільні выйшаў з КПСС.

1991 г. Сябра Цэнтральнай рады і выканаўчага камітэту Беларускай сацыял-дэмакратычнай партыі (Народная Грамада).

1995 г. Старшыня БСДП (НГ).

1991—1995 гг. Стваральнік і кіраўнік Беларускага згуртаваньня вайскоўцаў.

2000 г. Удзельнічаў у выбарах у Палату прадстаўнікоў.

2005 г. Асуджаны на тры гады абмежаваньня волі за арганізацыю 18—19 кастрычніка 2004 году ў Менску вулічнай акцыі супраць афіцыйных вынікаў парлямэнцкіх выбараў і рэфэрэндуму. Па амністыі тэрмін абмежаваньня волі быў скарочаны на год.

Кіраўнік аргкамітэту ў справе стварэньня Беларускай сацыял-дэмакратычнай партыі (Народная Грамада).

Эдуард Лобаў
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.

Затрыманы 18 сьнежня разам зь лідэрам МФ Зьмітром Дашкевічам, абвінавачаны ў хуліганстве. У Жодзінскім СІЗА за адмову сьведчыць супраць маладафронтаўцаў Эдуарда пагражалі перавесьці ў камэру, дзе зь ім жорстка расправяцца.

Зьміцер Дашкевіч
Нарадзіўся 20 ліпеня 1981 г. у вёсцы Кушняры Івацэвіцкага раёну Берасьцейскай вобласьці. Да пяці гадоў жыў у Расеі на Далёкім Усходзе. Потым сям’я перабралася ў Старыя Дарогі. Там скончыў школу № 2. Вучыўся ў Гарадзенскім сельскагаспадарчым інстытуце. У 2001 годзе прыйшоў у "Малады фронт". Увосень 2001 г. быў адным з абаронцаў Курапатаў. Пазьней паступіў у Віленскі пэдагагічны ўнівэрсытэт на факультэт славістыкі. Быў абраны кіраўніком Менскай гарадзкой арганізацыі "Маладога фронту". Актыўны ўдзельнік і арганізатар масавых акцыяў і мерапрыемстваў. За сваю палітычную дзейнасьць неаднаразова прыцягваўся да адміністрацыйнай адказнасьці. У 2004 г. абраны старшынём "Маладога фронту".
XS
SM
MD
LG