Лінкі ўнівэрсальнага доступу

Праваабаронцы папярэджваюць пра небясьпеку для грамадзтва


Прадстаўнікі арганізацый грамадзянскай супольнасьці Беларусі выступілі з заявай, у якой выказваюць заклапочанасьць шэрагам прапанаваных зьменаў у заканадаўстве.

Як адзначаецца ў заяве, гэтыя зьмены «маюць відавочна антыправавы характар, скіраваныя на празьмернае абмежаваньне правоў і свабод грамадзянаў, перашкаджаюць нармальнаму грамадзкаму дыялёгу і распальваюць канфрантацыю ў Беларусі.»

У заяве адзначаецца што зьмены ў закон “Аб органах дзяржаўнай бясьпекі Рэспублікі Беларусь” значна пашыраюць паўнамоцтвы спэцслужбаў, робяць іх бескантрольнымі і фактычна ставяць іх па-над законам.

У заяве таксама гаворыцца:

«Як стала вядома, ініцыяваньне зьменаў у Законы “Аб палітычных партыях”, “Аб грамадзкіх аб’яднаньнях”, у Крымінальны кодэкс і ў Кодэкс аб адміністратыўных правапарушэньнях было зьдзейсьненае Саветам міністраў яшчэ ў чэрвені бягучага году. Адсутнасьць грамадзкага абмеркаваньня гэтых надзвычай важных актаў, а таксама іх прыняцьце непразрыстым і непублічным парадкам ёсьць яшчэ адным сьведчаньнем неправавога характару гэтых паправак, прыняцьце якіх не было выклікана аб’ектыўнымі патрэбамі грамадзкага жыцьця.»

Падпісанты заявы папярэджваюць, што зьмены ў законы ставяць пад пагрозу вяртаньне краіны на шлях нармальнага разьвіцьця і заганяе яе ў стан самаізаляцыі. «Прыняцьце такога рэпрэсіўнага заканадаўства будзе азначаць легалізацыю гвалтоўных мэтадаў барацьбы з палітычнымі апанэнтамі, створыць у краіне атмасфэру страху, падштурхне грамадзтва да радыкалізму і зробіць немагчымым канструктыўны грамадзкі дыялёг.» Адказнасьць за гэта праваабаронцы ўскладаюць на распрацоўшчыкаў закону, дэпутатаў Палаты прадстаўнікоў і членаў Савета Рэспублікі.

Падпісанты заявы, сярод іншага заклікаюць Аляксандра Лукашэнку адмовіцца ад падпісаньня спрэчных законапраектаў, а Канстытуцыйны суд - скарыстацца правам канстытуцыйнага кантролю дзеля прадухіленьня парушэньня канстытуцыйных правоў і свабодаў грамадзянаў.

Заяву падпісалі:

Людміла Гразнова, Праваабарончы альянс
Алег Гулак, РПГА “Беларускі Хэльсынскі камітэт”
Уладзімер Колас, Рада беларускай інтэлігенцыі
Жана Літвіна, ГА “Беларуская асацыяцыя журналістаў”
Марыя Мартысевіч, РГА “Беларускі ПЭН-цэнтр”
Сяргей Мацкевіч, Асамблея няўрадавых дэмакратычных арганізацыяў
Вольга Смалянка, Цэнтар прававой трансфармацыі
Валянцін Стэфановіч, Праваабарончы цэнтар “Вясна”
Аляксей Шэін, Грамадзкая ініцыятыва “За свабоднае веравызнаньне”
Аляксандар Ярашук, Беларускі кангрэс дэмакратычных прафсаюзаў
XS
SM
MD
LG