Лінкі ўнівэрсальнага доступу

Беларусь не ўскладае асаблівай надзеі на інтэграцыйны каэфіцыент па зьніжэньні цаны расейскага газу, заявіў 11 кастрычніка журналістам у Менску намесьнік міністра энэргетыкі Юрый Рымашэўскі.

«Вы бачыце, якая сёньня сытуацыя па газе. Хаця нам абяцаны паніжальны інтэграцыйны каэфіцыент, у значнай ступені ён цану газу ня зьнізіць, а ў пэрспэктыве з выхадам на роўнадаходнасьць ён падымецца да той рынкавай цаны, якая ёсьць сёньня», — сказаў намесьнік міністра, перадае БЕЛТА.

Ён адзначыў, што адным з галоўных кірункаў разьвіцьця энэргетыкі ў Беларусі зьяўляецца ўкараненьне альтэрнатыўных крыніц энэргіі.

«Мы прыйшлі ўжо да таго, што прапрацоўваюцца пытаньні выманьня такога мясцовага рэсурсу, які ў нас ёсьць, як буры вугаль. Таксама ідзе праца над павелічэньнем здабычы торфу і далучэньнем яго да энэргетычнага балянсу. Аднак праблемы энэргетычнай бясьпекі гэта ня вырашыць. Таму мы ідзём на іншыя кардынальныя крокі, уключаючы будаўніцтва АЭС, буйных каскадаў ГЭС на нашых рэках і разьвіцьцё ветрапаркаў», — сказаў намесьнік міністра.

У жніўні прэм’ер-міністар Расеі Ўладзімер Пуцін даручыў Міністэрству энэргетыкі і «Газпрому» правесьці перамовы зь беларускім бокам, каб найбліжэйшым часам вызначыць паніжальны «інтэграцыйны» каэфіцыент для цаны паставак расейскага газу Беларусі.

Паказаць камэнтары

XS
SM
MD
LG