Лінкі ўнівэрсальнага доступу

Лябедзька заклікае лічыць асуджаных анархістаў вязьнямі сумленьня


Сёньня лідэр АГП Анатоль Лябедзька і бацькі зьняволеных беларускіх анархістаў заявілі пра пачатак кампаніі, якая мае на мэце прызнаньне асуджаных сёлета актывістаў анархісцкага руху палітвязьнямі і вызваленьне іх з турмаў.

Анатоль Лябедзька паведаміў, што ў часе свайго знаходжаньня ў СІЗА КДБ ён амаль паўтара месяца знаходзіўся ў адной камэры з арыштаваным анархістам Ігарам Аліневічам:

"Я вельмі рашучы ў тым, каб лічыць яго ды іншых асуджаных анархістаў палітычнымі вязьнямі, паколькі ён мне ў падрабязнасьцях распавядаў усе дэталі гэтай справы, пачынаючы ад таго, што яго скралі ў Расеі, а потым аформілі, што затрымалі быццам бы ў Беларусі. Ужо адно гэта прымушае зрабіць ясны вывад на гэты конт. Падчас знаходжаньня ў СІЗА ён быў зьбіты, але трымаўся вельмі годна ".

У часе нядаўняй паездкі ў Вашынгтон Анатоль Лябедзька на перамовах з амэрыканскімі палітыкамі прадставіў сьпіс палітвязьняў, якія сядзяць зараз у беларускіх турмах, агулам з 13 чалавек. У гэты сьпіс, апрача пакараных за Плошчу, уваходзяць актывісты "Маладога фронту" Дашкевіч і Лобаў, прадпрымальнік Аўтуховіч, а таксама асуджаныя анархісты Аліневіч, Францкевіч, Дзядок і Васьковіч. Пра іх лёс Анатоль Лябедзька гаварыў і з прадстаўнікамі Эўразьвязу, у прыватнасьці з уладамі Польшчы. І амэрыканскія, і эўрапейскія палітыкі настойваюць ня толькі на вызваленьні ўсіх беларускіх палітвязьняў, але і на іх рэабілітацыі, падкрэсьліў спадар Лябедзька.

Маці Ігара Аліневіча Валянціна яшчэ раз заявіла пра незаконнасьць і палітычныя матывы крымінальнага перасьледу яе сына. "Ён кінуў выклік уладам, і таму яго пакаралі",— перакананая яна. Цяпер жа ў калёніі абмяжоўваюць правы Ігара:

Валянціна Аліневіч

"Месяцамі я ня мела ад яго ўвогуле ніякай інфармацыі. Я разумела, што могуць быць катаваньні, магчымае нейкае ўзьдзеяньне, але старалася пра гэта ня думаць. Цяпер я з кожным днём даведваюся пра гэта ўсё болей і болей. Па-першае, ён сам распавёў, па-другое, ён піша пра гэта ў тых лістах, якія даходзяць да нас. Хаця пошта цяпер абмежаваная, за цэлы месяц я атрымала толькі адзін ліст, ніводнага тэлефанаваньня з калёніі не было".

Валянціна Аліневіч заклікае лічыць яе сына палітвязьнем. Такой жа думкі і бацька іншага зьняволенага, Мікалая Дзядка — Аляксандар:

Аляксандар Дзядок

"Тое, што яны палітзьняволеныя, бачна ня толькі з матэрыялаў крымінальнай справы, гэта бачна нават з выказваньняў дзяржабвінаваўцы на працэсе, які адкрыта заяўляў пра тое, што яны выступілі супраць улады. Справы аб анархістах — гэта справы безумоўна створаныя ў палітычных мэтах, для вырашэньня палітычных задач, і ў тым ліку каб прэвэнтыўна прыбраць у месцы пазбаўленьня волі маладых людзей, якія думаюць і якія неабыякавыя да нашай рэчаіснасьці".

Старшыня Беларускага Хэльсынскага камітэту Алег Гулак кажа, што ягоная арганізацыя зараз дадаткова вывучае матэрыялы асуджэньня анархістаў, і ў праваабаронцаў ёсьць прэтэнзіі да законнасьці гэтых прысудаў:

Алег Гулак

"Праблема, безумоўна, існуе. Папярэдне ацэньваючы, можна сказаць, што ёсьць і сур'ёзныя парушэньні, асабліва ў адносінах да Дзядка… Але ёсьць там пэўныя пазыцыі, што іх дзеяньні былі не заўсёды мірнымі. Але пытаньне — ува ўсіх ці не, яшчэ таксама трэба з гэтым разабрацца. Бабруйскія працэсы супраць анархістаў таксама адрозьніваюцца ад таго, што было ў Менску… Дастаткова складанае пытаньне, але праблема ёсьць, і таму мы зараз над ёю працуем, і я думаю, што ў бліжэйшы час нейкае рашэньне будзе, і мы яго будзем спрабаваць узгадняць з нашымі калегамі".

Тым часам былыя палітвязьні, нядаўна вызваленыя з турмаў — Фёдар Мірзаянаў і Ільля Васілевіч — сёньня заявілі, што зьбіраюцца зьехаць зь Беларусі.

Фёдар Мірзаянаў і Ільля Васілевіч

Фёдар Мірзаянаў:

"У Беларусі я заставацца намеру ня маю, бо я лічу, што тут знаходзіцца мне небясьпечна. Тыя людзі, якія мяне пасадзілі ў турму, яны застаюцца на волі, пры сваіх пасадах, некаторыя нават атрымалі падвышэньне ў званьні. І вельмі слабая пэрспэктыва таго, што яны будуць пакараныя за свае злачынствы".

Ільля Васілевіч:

"Я не адчуваю сябе вольным, гэта псэўдасвабода, я не адчуваю сябе ў бясьпецы. У любы момант могуць скласьці адміністратыўны пратакол пра тое, што я, напрыклад, нецэнзурна лаяўся. Тры пратаколы, адміністратыўны нагляд — пасадзіць у турму чалавека ў Беларусі вельмі проста".

Ільля Васілевіч і Фёдар Мірзаянаў заявілі, што пасьля вучобы за мяжой могуць вярнуцца ў Беларусь — калі зьменіцца рэжым.

Каго А.Лябедзька прапануе лічыць палітвязьнямі:


Ігар Аліневіч
Мікалай Аўтуховіч
Дзьмітры Бандарэнка
Алесь Бяляцкі
Яўген Васьковіч
Дзьмітры Вус
Дзьмітры Дашкевіч
Мікалай Дзядок
Эдуард Лобаў
Мікалай Статкевіч
Андрэй Саньнікаў
Павал Севярынец
Аляксандар Францкевіч

Паказаць камэнтары

XS
SM
MD
LG