Даляр на біржы — 8 600, эўра — 12 100

Дадатковую сэсію таргоў на Беларускай валютна-фондавай біржы правёў Нацыянальны Банк. Намесьнік кіраўнік НБ Тарас Надольны абвесьціў вынікі дадатковых таргоў. Даляр – 8 600, эўра – 12 100, расейскі рубель – 305.

Курсы валют у некаторых банках, паводле infobank.by






12.53 У абменьніку БелСьвісБанку на плошчы Свабоды — новыя курсы. Валюту прадаюць. Чарга — 3 чалавекі.



12.45 У абменным пункце БелСьвісБанку, які знаходзіцца каля ўнівэрсаму "Цэнтральны", на інфармацыйным таблё па-ранейшаму вісяць старыя курсы. Валюты ў абменьніку няма, як і ахвотных яе прадаць ці набыць. Такая самая сытуацыя ў абменьніках ля гандлёвага дома "На Нямізе", у "ГУМе".


12.45 Намесьнік кіраўнік НБ Тарас Надольны адзначыў, што прапанова на біржы была невялікая.”Прадаўцы занялі пазыцыю чаканьня”, – сказаў Надольны. “Таму можна сказаць, што мы знаходзімся на верхнім узроўні магчымага курсу… Трэнд курсу будзе накіраваны на зьніжэньне”.

Аб’ём прапановаў на дадатковай сэсіі склаў каля 8 мільёнаў даляраў – гэта меней за 5 % ад дзённай валютнай выручкі біржы.

Надольны таксама сказаў, што НБ не праводзіў інтэрвэнцыю, каб уплываць на абменны курс.


12.10 Кіраўнік прэсавай службы Нацбанку Аляксандар Цімашэнка заявіў "Свабодзе", што ня мае права пайсьці ў апэрацыйную залю і паглядзець, як адбываюцца таргі. Ён таксама адзначыў, што прадстаўнікі банкаў маюць доступ да апэрацыяў праз інтэрнэт. Цімашэнка таксама нагадаў, што Нацбанк рэкамэндаваў банкам вызначаць абменны курс пасьля таго, як на біржы скончыцца дадатковая сэсія продажу валюты.

Крыніца ў БВФБ: курс на дадатковай сэсіі –8 600 за даляр.


11.02 Банкі зьменяць курсы куплі і продажу валюты пасьля дадатковай сэсіі на біржы

Пра гэта паведаміла ўправа інфармацыі Нацбанку.

"Нацыянальны банк раіў банкам пры вызначэньні абменных курсаў замежных валютаў для зьдзяйсьненьня валютна-абменных апэрацыяў з удзелам фізычных асобаў арыентавацца на курсы, якія склаліся па выніках дадатковай гандлёвай сэсіі", — заявілі БелаПАН у НБ.


Фота Denis Kondratovich

11.00 Пачаліся таргі.

Першай адбудзецца асноўная сэсія. Пасьля – дадатковая. Плянуецца, што гэтыя сэсіі пройдуць за гадзіну.


Пасьля заканчэньня таргоў, чакаецца, што на біржу прыедзе намесьнік кіраўніка Нацбанку Тарас Надольны. Ён павінен абвесьціць вынікі таргоў.
Пра гэта паведаміў прадстаўнік БВФБ Віталь Ціханаў.
Таргі праходзяць дыстанцыйна, пры дапамозе кампутараў. На біржы няма прадстаўнікоў банкаў, а толькі невялікая колькасьць маклераў.
Прадстаўнікі біржы ня дзеляцца інфармацый, пра колькасьць пададзеных заявак.

Інфармацыю пра колькасьць пададзеных заявак на набыцьцё і продаж валюты не абвяшчаюць.



На сэсіі БВФБ можна будзе прадаць і набыць замежную валюту. Сам НБ будзе гуляць на асноўнай і дадатковай сэсіях.

14 верасьня Нацбанк таксама пачынае абмяжоўваць валютныя зьдзелкі на пазабіржавым рынку. Юрыдычныя асобы змогуць набыць у банкаў або прадаць ім па-за біржай суму, якая не перавышае 1 біржавага лота — гэта адна тысяча адзінак замежнай валюты.

14 верасьня НБ абяцаў скасаваць абмежаваньні на фармаваньне абменнага курсу на пазабіржавым рынку, у тым ліку і на рынку наяўнай валюты.

"Скасоўваюцца ўсталяваныя скрайнія значэньні абменных курсаў, па якіх могуць ажыцьцяўляцца купля-продаж і канвэрсія замежнай валюты на ўнутраным валютным рынку", – гаворыцца ў паведамленьньі НБ, распаўсюджанам напярэдадні.

Банка дадзена права “ўсталёўваць абменны курс, арыентуючыся на курсы, якія склаліся па выніках дадатковай гандлёвай сэсіі на Беларускай валютна-фондавай біржы".

Пасьля таго, як 24 траўня ў Беларусі адбылася дэвальвацыя, Нацбанк зноў увёў абмежаваньні на вызначэньне абменнага курсу– не болей за 2% да афіцыйнага абменнага.