Бліц-агляд падзеяў і тэмаў у Беларусі, сьвеце, гісторыі.
НА ЗАХАДЗЕ КАРОТКІЯ ДАЖДЖЫ, МЕСЦАМІ З НАВАЛЬНІЦАМІ...
Удзень 19 – 25°С, на захадзе Берасьцейскай і Гарадзенскай абласьцей 16 – 18°С.
НЕ ПРАХОДЗЬЦЕ МІМА:
Прэзэнтацыя кнігі літаратурна-крытычных эсэ і ўспамінаў Яна Максімюка “Словы ў голым полі” (Менск, кнігарня “ЛогвінаЎ”, пр. Незалежнасьці, 37а, 19.00).
ПАДЗЕІ Ў СЬВЕЦЕ:
Парлямэнт Францыі мае прагаласаваць па пытаньні аб фінансавай дапамозе Грэцыі.
Міжнародны трыбунал па былой Югаславіі вынесе прысуд у справе былога начальніка генштабу арміі Югаславіі Момчылы Перышыча.
У Вашынгтоне ў якасьці новага дырэктара ЦРУ прывядуць да прысягі Дэйвіда Пэтрэўса.
У Сынгапуры пройдзе саміт Сусьветнага банку ў пытаньнях фінансавай інфраструктуры.
У Лёндане абвесьцяць шорт-ліст намінантаў Букераўскай прэміі.
У Ялце распачнецца міжнародны музычны фэстываль Crimea Music Fest (працягнецца да 10 верасьня).
У Зеніцы адбудзецца кваліфікацыйны матч футбольнага чэмпіянату Эўропы 2012 году паміж зборнымі Босьніі і Герцагавіны і Беларусі.
У ГЭТЫ ДЗЕНЬ:
1716 – у Бостане скончылася будаўніцтва першага амэрыканскага маяка.
1819 – амэрыканскі вынаходнік Томас Бланчард запатэнтаваў такарны станок.
1873 – створана Шатляндзкая фэдэрацыя футболу, адна з найстарэйшых у сьвеце.
1932 – у Гішпаніі адмянілі сьмяротную кару і пажыцьцёвае зьняволеньне.
1933 – адбыўся абмен на савецка-польскай мяжы: пісьменьнік Францішак Аляхновіч вяртаецца з савецкай вязьніцы ў Заходнюю Беларусь, а палякі перадаюць саветам палітыка і вучонага Браніслава Тарашкевіча.
1987 – у Балтымары ўпершыню хірургічным спосабам былі разьдзеленыя сіямскія блізьняты.
1991 – Дзяржсавет СССР пад старшынёўствам Міхаіла Гарбачова прызнае незалежнасьць Літвы, Латвіі і Эстоніі. Таксама ў гэты дзень Чачэнская Рэспубліка Ічкерыя абвяшчае сябе незалежнай.
1997 – у Менску адбыўся ўстаноўчы сойм “Маладога фронту”.
2005 – Каліфорнія стала першым штатам ЗША, які легалізаваў гомасэксуальныя шлюбы.
У гэты дзень нарадзіліся:
1792 – Іван Грыгаровіч – беларускі гісторык, археограф, сьвятар, аўтар шматлікіх працаў з гісторыі земляў сучаснай Беларусі.
1907 – беларускі актор і рэжысэр Леанід Рахленка.
1908 – Льюіс Эсэн – брытанскі фізык, стваральнік кварцавага і атамнага гадзіньнікаў.
1940 – Юозас Будрайціс – літоўскі актор тэатру і кіно.
1943 – Роджэр Уотэрз – адзін з заснавальнікаў і шматгадовы лідэр рок-гурту “Пінк Флойд”, басіст, вакаліст, кампазытар і аўтар тэкстаў песьняў.
1957 – Мікалай Пінігін – беларускі тэатральны рэжысэр.
У гэты дзень памерлі:
1656 – Піліп Абуховіч – ваявода віленскі і смаленскі, пісар літоўскі, кіраваў абаронаю Смаленску ад войска Маскоўскай дзяржавы ў 1654 годзе. Пасьля доўгай аблогі Абуховіч мусіў здаць горад маскавітам, за што шмат хто называў яго здраднікам. Клясычны твор тагачаснай беларускай мэмуарыстыкі – “Ліст да Абуховіча”, які прыпісваюць смаленскаму шляхціцу Цыпрыяну Камуняку, перадае атмасфэру таго часу.
1907 – Сюлі Прудом – францускі паэт, Нобэлеўскі ляўрэат 1901 году.
1921 – Кандрат Лейка – беларускі празаік, драматург і пэдагог, пачынальнік беларускай дзіцячай літаратуры.
1998 – Акіра Курасава – японскі кінарэжысэр, прадусэр і сцэнарыст.
2007 – Лючана Павароцьці – італьянскі опэрны сьпявак.
МІНУС 365:
Год таму на сайце “Свабоды”: “Сьвятлана Калінкіна: ні пра што сур'ёзнае ў нашай краіне не папярэджваюць”
ЦЫТАТА НА ПАМЯЦЬ:
“Тваё жыцьцё ўвесь час з табою,
яно ня больш, чым згледзіш вокам і кранеш рукою”.
Роджэр Уотэрз, зь песьні “Дыханьне” з альбому “Цёмны бок Месяца” (1973)