Лінкі ўнівэрсальнага доступу

Сёньня Магілёўскі абласны суд не задаволіў скаргі двух грамадзян, якіх на афіцыйны Дзень незалежнасьці затрымалі ў Магілёве на пешаходнай вуліцы Ленінскай. Пазьней Ленінскі суд Магілёва прызнаў Алега Дзьячкова й Аляксандра Сімановіча вінаватымі ва ўдзеле ў несанкцыянаваным шэсьці. Сваёй віны хлопцы не прызнаюць. Затрыманьне й пакараньне лічаць незаконнымі.

Алег Дзьячкоў апынуўся ў аўтобусе міліцэйскага спэцназу 3 ліпеня пасьля таго, як кінуўся бараніць журналістку Ганну Ільіну ад невядомых асобаў у цывільным. Хлопец сьцьвярджае, што дзяўчыну гвалтам цягнулі ў аўтобус. Яна крычала, клікала на дапамогу. 8 ліпеня судзьдзя Ленінскага суду Ірына Сарока ацаніла ўчынак Алега Дзьячкова штрафам у 30 базавых велічыняў. Сёньня яго скаргу разглядаў судзьдзя абласнога суду Павал Клімаў. Ён не знайшоў падстаў, каб задаволіць пратэст Дзьячкова:

Алег Дзьячкоў

“Я ўсё ж спадзяваўся, што абласны суд адменіць рашэньне спадарыні Сарокі. Ня спраўдзіліся мае чаканьні. Я расчараваны, вядома. У іх, відаць, быў плян па затрыманьнях, і я, як кажуць, трапіў у агульную масу гэтых затрыманых без разбору. Далей абскарджваць ня буду, бо ня бачу ў гэтым сэнсу”, пракамэнтаваў рашэньне Клімава Алег Дзьячкоў.

Суду Алег Дзьячкоў прадставіў відэа таго, як яго затрымлівалі і як ён бараніў дзяўчыну. Судзьдзя Клімаў, аднак, доказ абароны кваліфікаваў як доказ віны:

“Лічу пастанову законнай і абгрунтаванай, а прадстаўленыя вамі дадатковыя матэрыялы не абвяргаюць законнасьць і абгрунтаванасьць дадзенай пастановы, а наадварот, пацьвярджаюць удзел Дзьячкова ў несанкцыянаваным шэсьці”, тлумачыў сваё рашэньне Павал Клімаў.


Засталася не задаволенай і скарга Аляксандра Сімановіча на пастанову судзьдзі Ленінскага суду Тацяны Пархоменкі. Судзьдзя 7 ліпеня вынес хлопцу папярэджаньне. Разглядаў яго пратэст сёньня судзьдзя Ўладзімер Навітанюк. Ён таксама не знайшоў падстаў для скасаваньня пастановы сваёй каляжанкі зь Ленінскага суду.

3 ліпеня Аляксандра затрымалі ў сквэры, дзе зьбіраюцца ўдзельнікі маўклівых пратэстаў. Сюды ён прыйшоў разам зь цяжарнай жонкай. Жонку не затрымалі. Яна чакала мужа некалькі гадзін на волі каля Ленінскага аддзелу міліцыі.

І Алега Дзьячкова, і Аляксандра Сімановіча 3 ліпеня адпусьцілі на волю. Дзьячкова паўторна затрымалі 7 ліпеня, а Сімановіча — 6 ліпеня. Ноч да суду яны праседзелі ў ізалятары часовага ўтрыманьня.

Без затрыманьняў не абышлася і ўчорашняя маўклівая акцыя пратэсту ў Магілёве. На гадзіну зьняволілі яе ўдзельніка, які называе сябе Паўлам. Як ён кажа, у парушэньні правапарадку яго зьвінаваціў міліцыянт у званьні падпалкоўніка:

“Затрымалі мяне за тое, што я курыў у неналежным месцы, як яны сказалі. Гэта звычайная дзіцячая забаўная сытуацыя. Хлопцам некага трэба было за нешта забраць. У іх галоўная мэта — запалохаць. Я выходжу пратэставаць як грамадзянін гэтай краіны, які ў шоку ад таго, што адбываецца ў дзяржаве”, зазначае ўдзельнік маўклівага пратэсту Павал.

Паводле суразмоўцы, у Ленінскім аддзеле міліцыі на яго пратаколаў не складалі. Як ён сьцьвярджае, паводзілі міліцыянты сябе з выклікам. Павал кажа, што зноў прыйдзе на маўклівы пратэст.

У Магілёве ўчора ўвечары ўдзельнікаў маўклівага пратэсту было каля трох дзясяткаў. Удзень была спроба правесьці акцыю на Віленскім рынку. Прыйшлі на яе дзясятак чалавек.

Паказаць камэнтары

XS
SM
MD
LG