Лінкі ўнівэрсальнага доступу

У Бабруйску й Магілёве адбыліся маўклівыя акцыі пратэсту


Улётка, якая раздаецца ўдзельнікам акцыяў маўклівага пратэсту

Улётка, якая раздаецца ўдзельнікам акцыяў маўклівага пратэсту

У Бабруйску на маўклівы пратэст людзі пачалі зьбірацца а 19 гадзіне ў сквэры насупраць плошчы Леніна. Гэта традыцыйнае месца збору. Сюды прыйшло каля трох дзясяткаў чалавек.

“Вельмі шмат было міліцыі. Мы зайшлі ў двор -- іх тут стаіць “Камаз” такі крыты. Ён поўны міліцыянтаў. Наагул усё спакойна прайшло. Мы размаўлялі, некаторыя елі марозіва. Некаторыя проста прагульваліся. Міліцыянты нават віталіся з намі, бо на акцыю апошнім часам прыходзяць адны й тыя ж людзі. І адны й тыя ж міліцыянты. Некаторыя прыходзілі сёньня й на рынак у 13 гадзінаў, але ніхто нічога там не арганізоўваў. Людзі ўжо не задаволеныя, тым як акцыі праходзяць. Усё меней і меней людзей прыходзіць на іх”, – зазначыў адзін з удзельнікаў бабруйскай маўклівай акцыі Эдуард.

Як паведаміў суразмоўца па сканчэньні акцыі да яго пад’ехаў на службовай машыне супрацоўнік міліцыі. Яго зацікавіла майка з надпісам “ШОС”.

“Ён праверыў мой пашпарт. Задаў пытаньне пра “ШОС”. Я адказаў, што гэта Шанхайская арганізацыя супрацоўніцтва. Таксама пацікавіўся, ці па адрасе прапіскі я жыву. На гэтым разьвітаўся”.

У Магілёве таксама ў сквэры насупраць плошчы Леніна на пляцоўцы перад Беларуска-Расейскім унівэрсытэтам сабралася каля трох дзясяткаў чалавек. Сквэр праз бульвар Леніна, дзе раней зьбіраліся “маўчуны”, ачапілі міліцыянты. Тут жа прыпаркаваўся аўтобус міліцэйскага спэцназу.

На акцыю прыйшлі ў асноўным маладыя людзі. Былі й сямейныя пары з малымі дзецьмі ў вазках. Сьмельчакі наважваліся гучным плясканьнем адганяць камароў.

У Магілёве сёньня ўжо было спроба арганізаваць маўклівую акцыю пратэсту на мясцовым Віленскім рынку. На яе прыйшлі каля дзесятка чалавек.

У Бабруйску й Магілёве акцыі маўклівага пратэсту прайшлі без затрыманьняў.

У Асіповічах маўклівы пратэст не адбыліся. Райцэнтар рыхтуецца да візыту сюды Лукашэнкі. Мясцовыя жыхары кажуць, што дужа шмат міліцыі.
XS
SM
MD
LG