Лінкі ўнівэрсальнага доступу

Прэзыдэнцкая адміністрацыя адказала БАЖ


Андрэй Бастунец

Андрэй Бастунец

Адміністрацыя прэзыдэнта адрэагавала на зварот Беларускай асацыцыі журналістаў да кіраўніка краіны Аляксандра Лукашэнкі.

21 чэрвеня БАЖ зьвярнуўся да кіраўніка краіны з заклікам вызваліць асуджаных пасьля 19 сьнежня журналістаў, спыніць крымінальны перасьлед Андрэя Пачобута, даручыць міністэрству інфармацыі адклікаць пазовы аб закрыцьці газэтаў «Народная воля» і «Наша Ніва», а таксама адмяніць рашэньне аб спыненьні «Аўтарадыё».

Літ з адміністрацыі прэзыдэнта падпісаў начальнік галоўнага ўпраўленьня па працы са зваротамі грамадзянаў і юрыдычных асобаў Бука.

У ім гаворыцца, што закранутыя пытаньні належаць да сфэры правасудзьдзя і падлягаюць вырашэньню ў судовым парадку.

«Пры гэтым асобы, адносна якіх вынесеныя прысуды, маюць права абскардзіць у вышэйшыя судовыя інстанцыі законнасьць і абгрунтаванасьць пастановы такіх прысудаў. Што тычыцца разгляду гаспадарчымі судамі спраў з удзелам Міністэрства інфармацыі, то парадак адкліканьня пазоўных заяў і перагляду судовых пастановаў вызначаны гаспадарчым працэсуальным кодэксам».

Падчас прэс- канфэрэнцыі 17 чэрвеня Аляксандар Лукашэнка згадаў БАЖ і выказаў пажаданьне, каб гэта грамадзкае аб’яднаньне зьвярнулася да яго асабіста з просьбай аб вызваленьні палітвязьняў.

Паводле намесьніка старшыні БАЖ Андрэя Бастунца, спадзеваў на станоўчы адказ амаль не было. З узьнятых у звароце пытаньняў толькі адно знайшло станоўчае вырашэньне: міністэрства інфармацыі адклікала пазовы аб закрыцьці «Народнай волі» і «Нашай Нівы».

«Па справе Пачобута вынесены прысуд, які дазволіў журналісту застацца на волі, што, безумоўна, мы ацэньваем станоўча. Але ж прысуд — абвінаваўчы, і Андрэй увесь час знаходзіцца пад пагрозай рэальнага зьняволеньня. Акрамя таго, абвінаваўчы вырак можа пацягнуць за сабой узмацненьне самацэнзуры сярод СМІ і журналістаў. Сытуацыя ж з пазбаўленьнем права на вяшчаньне „Аўтарадыё“ ніяк не зьмянілася. Не вызвалілі і асуджаных пасьля падзеяў 19 сьнежня журналістаў і сяброў БАЖ», — заявіў прэс-службе БАЖ Андрэй Бастунец.
XS
SM
MD
LG