Лінкі ўнівэрсальнага доступу

Бліц-агляд падзеяў і тэмаў у Беларусі, сьвеце, гісторыі.


ТО ДОЖДЖ, ТО СОНЦА


У суботу пакрапае, 19 – 25°С. У нядзелю суха, 18 – 26°С.

НЕ ПРАХОДЗЬЦЕ МІМА:


16 ліпеня, субота

На хутары "Шаблі" (Валожынскі раён, вёска Малое Запрудзьдзе, 29а) адбудзецца музычны праект “Канцэрт на траве 2”, у якім возьмуць удзел гурты “У нескладовае”, “Akute”, “the Silicon” і выканаўца Vinsent. Пачатак у 18.00.

У паб-клюбе “Графіці” (Менск, завулак Калініна, 16) традыцыйна пройдзе джазавы вечар. У гэты дзень госьці змогуць атрымаць асалоду ад выступу гурту “The Road Dogs”, які выконвае песьні на ангельскай, польскай і расейскай мовах. У рэпэртуары калектыву як кавэр-вэрсіі, так і свае ўласныя творы. Пачатак вечарыны ў 18.00, канцэрту – у 19.00.

Акцыя салідарнасьці зь беларускімі палітвязьнямі (Прага, Старамесцкая плошча, 18.00).

17 ліпеня, нядзеля

У менскім паб-клюбе “Графіці” госьці змогуць паслухаць падваротна-стадыённы калектыў “Маланка аркестар”. Пачатак у 18.00.

У “Jack club” (Менск, вул. Няміга, 12) выступіць рок-група "ProSSpekt", створаная на базе Інстытуту журналістыкі БДУ ў лютым 2010 году. Пачатак у 21.30.

ТАМ, ДЗЕ НАС НЯМА:


16 ліпеня

Татарстан. Заплянаваны пачатак апэрацыі для падняцьця патанулага цеплахода “Булгарыя”.

Фінляндыя. Візыт генэральнага сакратара ААН Пан Гі Муна (16 – 17 ліпеня).

Шанхай (КНР). Стартуе чэмпіянат сьвету па водных відах спорту (16 – 31 ліпеня).

17 ліпеня

Дубна (Маскоўская вобласьць). Стартуе чэмпіянат сьвету па водных іртах 2011 (17 – 24 ліпеня).

Сан-Тамэ і Прынсыпі. Прэзыдэнцкія выбары.

Турцыя. Візыт эўракамісара ў пытаньнях пашырэньня ЭЗ Штэфана Фюле.

Грэцыя. Візыт дзяржсакратара ЗША Гілары Клінтан (17 – 18 ліпеня).

ТАКСАМА Ў ГЭТЫ ДЗЕНЬ:


16 ліпеня лічыцца днём пачатку падзелу агульнай хрысьціянскай царквы на каталіцкую і праваслаўную. У гэты дзень у 1054 годзе рымскі папа Леў ІХ наклаў анафэму на канстантынопальскага патрыярха Міхаіла.

1872 – нарадзіўся Раальд Амундсэн, нарвэскі палярнік, падарожнік і першаадкрывальнік.

1918 – у Екацерынбургу бальшавікі расстралялі расейскага цара Мікалая II разам зь ягонай сям’ёй.

1979 – прэзыдэнтам Іраку стаў дыктатар Садам Хусэйн.

17 ліпеня

1399 – пакінула гэты сьвет польская каралева Ядвіга, жонка вялікага князя літоўскага Ягайлы. Іхны шлюб адбыўся пасьля заключэньня Крэўскай уніі паміж Польшчай і Вялікім Княствам. З гэтага моманту найвышэйшыя кіраўнікі дзяржавы нашых продкаў часьцяком зьяўляліся яшчэ й польскімі каралямі. А было каралеве Ядвізе напрыканцы яе жыцьця ўсяго 25 гадоў. Зрэшты, і замуж у той час выходзілі раней, чым цяпер. Ядвіга ажанілася зь Ягайлам, маючы ўсяго 13 гадоў.

1924 – уведзены новы адміністрацыйна-тэрытарыяльны падзел Беларусі. Краіна дзялілася на 10 акругаў і 100 раёнаў. Новы падзел быў зьвязаны з так званым узбуйненьнем БССР, калі Беларусі былі часткова вернутыя тэрыторыі Віцебскай, Гомельскай і Смаленскай губэрняў.

1959 – нарадзіўся беларускі празаік Барыс Пятровіч, галоўны рэдактар часопісу “Дзеяслоў”.

1975 – стыкоўка савецкага касьмічнага карабля “Саюз” і амэрыканскага “Апалён”. У самы разгар халоднай вайны гэтая падзея мела сымбалічны мірны характар, таму назва “Саюз-Апалён” хутка сталася гандлёвым брэндам, які да сёньня жыве ў назьве папулярных цыгарэт.

ЁСЬЦЬ НАГОДА:


16 ліпеня

Грузія, Дзень духоўнай любові.

Украіна, Дзень бухгальтара.

Украіна (Адэса), Дзень дыні.

17 ліпеня

Славаччына, Дзень незалежнасьці.

Фінляндыя, Дзень дэмакратыі.

Паўднёвая Карэя, Дзень канстытуцыі.

МІНУС 365:


Падушка — зброя маладзёнаў

ЦЫТАТА НА ПАМЯЦЬ:


«Людзі доўга не жывуць» – Барыс Пятровіч.
XS
SM
MD
LG