Лінкі ўнівэрсальнага доступу

logo-print
Падатковая інспэкцыя Маскоўскага раёну Менску 24 мая паспрабавала апісаць маёмасьць праваабарончай арганізацыі "Беларускі Хэльсынскі камітэт".

"Нам час ад часу нагадваюць пра нявыплачаную суму. Мы рэгулярна ходзім і ў пракуратуру, і ў падатковую інспэкцыю, дзе сьцьвярджаем, што грошы, атрыманыя ў рамках праграмы ТАСІС, не абкладаліся падаткамі. У той час, калі мы атрымлівалі грошы па гэтай праграме, Савет міністраў не прывёў беларускае заканадаўства ў адпаведнасьць з указам прэзыдэнта, згодна зь якім гуманітарная дапамога, якая атрымліваецца ў рамках праграмы ТАСІС, павінна абкладацца падаткам. Таму вінаватымі ў няплаце падаткаў мы сябе ня лічым", — заявіў юрыст БХК Гары Паганяйла.

Паводле Паганяйлы, усе рахункі арганізацыі заблякаваныя. БХК ня мае ніякай уласнасьці — усё абсталяваньне і маёмасьць ён арандуе. Таму, як заявіў Паганяйла, у адпаведнасьці з законам апісаць у БХК няма чаго.

Канфлікт паміж падатковай інспэкцыяй і БХК цягнецца ўжо больш за пяць гадоў. Падатковая інспэкцыя выставіла да БХК прэтэнзіі, што арганізацыя не сплаціла падаткі на сродкі, атрыманыя ў якасьці гуманітарнай дапамогі па праграме ТАСІС.

Летам 2004 году гаспадарчы суд Менску зьняў з БХК абвінавачваньні ва ўхіленьні ад выплаты падаткаў, аднак гэтае рашэньне апратэставаў намесьнік старшыні Вышэйшага гаспадарчага суду Яўген Сьмірноў. У сьнежні 2004 году прэзыдыюм Вярхоўнага суду задаволіў яго пратэст і абавязаў БХК выплаціць падаткі і штрафныя санкцыі на суму прыкладна 75 000 даляраў ЗША.

1 лістапада 2006 году гаспадарчы суд Менску пастанавіў канфіскаваць частку маёмасьці БХК на суму 255 тысяч рублёў у лік сплаты 160 млн. рублёў штрафу і падатковых запазычанасьцяў.
XS
SM
MD
LG