Лінкі ўнівэрсальнага доступу

Рэчыца: папераджальны страйк півавараў


Прадпрыемства "Рэчыцапіва"

Прадпрыемства "Рэчыцапіва"

Сёньня ўранку рабочыя варачна-брадзільнага цэху акцыянэрнага таварыства «Рэчыцапіва», якое належыць галяндзкай піваварнай кампаніі «Heineken», адмовіліся пачынаць працу. Прычынай папераджальнага страйку стала нявыплата прэміяльных, прадугледжаных кантрактамі.

Апавядае адна з працаўніц варачна-брадзільнага цэху:

«Сёньня мы папярэдзілі кіраўніцтва, што не пачнём працу, пакуль нам ня выплацяць прэміяльныя. Гэта ў памеры 30 працэнтаў ад акладу. Калі аклад у рабочага асноўнага цэху 510–530 тысяч, то 150–160 тысяч прэміяльных на месяц — гэта таксама грошы. Людзі ўсе настроеныя па-баявому».

З «Рэчыцапіва» ў філіял замежнага закрытага акцыянэрнага таварыства «Піваварная кампанія «Heineken» рабочых перавялі ад пачатку красавіка. Адміністрацыя пры заключэньні кантрактаў абяцала налічваць штомесячна 30-працэнтныя прэміяльныя выплаты. Аднак у мінулую пятніцу, пасьля працяглага стаяньня ў чэргах каля банкаматаў, півавары выявілі, што прэміяльныя за красавік ім не налічылі. Гэта й выклікала незадавальненьне, бо ў зьвязку з новым курсам валюты заробак півавараў стаў у эквіваленце ніжэйшым за 100 даляраў:

«Ішла нават размова пра тое, што людзі будуць пісаць заявы на звальненьне, калі нічога ня зьменіцца. Нас засталося няшмат пасьля ўсіх гэтых мадэрнізацыяў і скарачэньняў. Увесь працэс тэхналягічны чалавек з вуліцы ня прыйдзе і ня зробіць, бо гэта ня грузчык і не прыбіральшчыца, якой можна сказаць: тут мяці, а тут не мяці. Варачна-брадзільны цэх — гэта асноўная вытворчасьць».

Улагоджваць сытуацыю на «Рэчыцапіве» ўранку прыяжджаў намесьнік старшыні райвыканкаму Вячаслаў Памалейка.

Дырэктарка прадпрыемства Натальля Савасьценка апавяла журналістам, што ніякага страйку ў цэху не было. Піва варылі нават ноччу:

«І ноччу працавалі, і з раніцы працавалі. І ні на сэкунду ніхто нікуды не адышоў, не адлучыўся. Дарэчы, Памалейка ўсё гэта бачыў. Усё добра! Людзі прыйшлі на працу, спакойна вараць, займаюцца. Ёсьць сякія-такія ўнутраныя пытаньні, дык іх усюды хапае, на ўсіх прадпрыемствах».

Да 11-й гадзіны інцыдэнт быў улагоджаны. Дырэктарка атрымала электроннае пацьверджаньне, што прэміяльныя з галаўнога прадпрыемства піваварам пералічылі. Рабочых запэўнілі, што кіраўніцтва будзе клапаціцца і пра падвышэньне ім аплаты працы.

Людзі атрымаюць таксама на рукі й працоўныя кантракты. Раней працаўнікі скардзіліся на тое, што кантракты ім не выдаюцца, у раённую інспэкцыю дэпартамэнту аховы працы, але тая не рэагавала.

Рэчыцкі лідэр прадпрымальніцкага руху «За свабоднае разьвіцьцё прадпрымальніцтва» Алег Шабетнік, якога інспэкцыя аховы працы хацела аштрафаваць толькі за тое, што ён туды своечасова не зьявіўся, так пракамэнтаваў сытуацыю ў варачным цэху «Рэчыцапіва»:

Алег Шабетнік
«Гэта несправядліва. Інспэкцыя аховы працы мусіць імгненна рэагаваць. Людзі, цэлы цэх працуе без кантрактаў амаль два месяцы. Прэміяльныя ім не выплачваюць. Нечуванае парушэньне правоў працоўных! Яны як бы падвешаныя ў паветры: яны працуюць, не працуюць? Ім плацяць нейкія 500 тысяч рублёў. Чалавек прыйшоў на працу, і ён павінен мець кантракт на руках і ведаць, за што ён працуе. А так незразумела, ён працуе ці яго выкарыстоўваюць як танную наёмную працоўную сілу».

Піваварнаму прадпрыемству «Рэчыцапіва» тры з паловай дзесяцігодзьдзі. Яно ўваходзіць у шасьцёрку найбуйнейшых прадпрыемстваў піваварнай галіны Беларусі.

У 2000 годзе на аснове «Рэчыцапіва» было створанае сумеснае беларуска-літоўскае акцыянэрнае прадпрыемства. Тры гады таму, у траўні 2008-га, галяндзкая піваварная кампанія «Heineken» выкупіла за 9,9 мільёна даляраў 51 адсотак акцый прадпрыемства, якія належалі Гомельскай вобласьці. Зараз яна валодае ўжо 95,4 адсотка статутнага фонду.

Пасьля мадэрнізацыі на прадпрыемстве пачалі выпускаць ня толькі піва «Дняпроўскае», «Баброў моцнае», «Доктар Дызэль», але й рэчыцкі квас «Хатні».

Паказаць камэнтары

XS
SM
MD
LG