Лінкі ўнівэрсальнага доступу

logo-print

Мясьніковіч абяцае захады па стабілізацыі рубля

  • БелаПАН

Прэм'ер-міністар Беларусі Міхаіл Мясьніковіч заявіў 20 траўня, што ў бліжэйшыя дні ўрад і Нацбанк Беларусі прымуць рашэньні для стабілізацыі сытуацыі на валютным рынку.

Пра крэдытную падтрымку з Антыкрызыснага фонду ЕўрАзЭС у памеры 3 мільярды даляраў Мясьніковіч сказаў наступнае:

"Плянуецца, што ў канцы траўня — пачатку чэрвеня будуць прынятыя адпаведныя рашэньні, на падставе якіх будуць прынятыя адпаведныя зьнешнія запазычаньні. Мы ўчора са старшынём ураду Расейскай Федэрацыі яшчэ абмяркоўвалі гэта пытанне. Першы транш крэдыту ацэньваецца дзесьці ў 800 мільёнаў даляраў, дзесьці ў пачатку восені будзе другі транш, крыху больш за 400 мільёнаў даляраў у разліку на тое, што, у прынцыпе, на тры гады — 3 мільярды даляраў".

Мясьніковіч дадаў:

"Але я хачу, каб усе разумелі — гэта ня тыя сродкі, якія могуць стабілізаваць стан справаў на валютным рынку. Для гэтага неабходныя сур'ёзныя ўласныя рашэньні, якія мы будзем прымаць разам з Нацбанкам літаральна ў панядзелак-аўторак".

Паводле прэм'ер-міністра, выхад на ўніфікаваны курс нацыянальнай валюты будзе адбывацца ў два этапы. "На першым этапе будуць прынятыя рашэньні, каб зьбіць павышаны попыт, а пасля атрыманьня стабілізацыйнага крэдыту курс будзе фармавацца на падставе попыту і прапановы, што зьнізіць тыя чаканьні, якія сёння пакуль яшчэ прысутнічаюць".

Паколькі, на думку Мясьніковіча, эканоміка працуе стабільна, то ён не выключае, што "можа быць нават рэвальвацыя абменнага курсу беларускага рубля".

Паказаць камэнтары

XS
SM
MD
LG