Лінкі ўнівэрсальнага доступу

Прэзыдэнт Беларусі Аляксандар Лукашэнка ўдзячны Азэрбайджану за пастаўкі нафты, ён заявіў, што беларускі бок гатовы на гэта адказаць дабром. Пра гэта паведамляе Інтэрфакс.

"Вы нам выдатна дапамаглі. Нашы незалежнасьць і сувэрэнітэт, на жаль, сёньня ўпіраюцца ў гэтыя злашчасныя энэрганосьбіты, сыравіну і матэрыялы. Вы падставілі нам плячо, мы сёньня перапрацоўваем вашу нафту найвышэйшай якасьці", -- заявіў А.Лукашэнка, сустракаючыся ў чацьвер у Менску зь першым віцэ-прэм'ерам ураду Азэрбайджану Ягубам Эюбавым.

"Вы нас проста абаранілі і выратавалі нашы сувэрэнітэт і незалежнасьць, як і Вэнэсуэла", -- адзначыў прэзыдэнт Беларусі.

А.Лукашэнка сказаў, што Беларусь і Азэрбайджан сёньня супрацоўнічаюць "найшчыльнейшым чынам, па вельмі адчувальных для нас і вас напрамках". "Закрытых тэм у нашых адносінах няма. І што б мне ні казалі аб нашых адносінах з Азэрбайджанам, у тым ліку ў АДКБ, іншых структурах, вы -- тая краіна, якая падставіла ў цяжкія хвіліны сваё плячо нам", -- заявіў А.Лукашэнка.

"Мы -- людзі ўдзячныя, і таму мы проста абавязаныя адказаць вам дабром", -- сказаў Лукашэнка.

«Я хачу, каб вы перадалі прэзыдэнту Ільхаму Аліеву, што мы будзем верныя дамоўленасьцям, якіх мы дасягнулі, у тым ліку і нядаўна ў Баку», -- адзначыў прэзыдэнт Беларусі.

Летась у разгар вострага беларуска-расейскага газавага канфлікту І.Аліеў пазычыў Беларусі 200 млн. даляраў, што дала магчымасьць заплаціць даўгі «Газпрому». Пазьней паміж Менскам і Баку былі заключаныя пагадненьні аб пастаўках азэрбайджанскай нафты ў Беларусь у абмен на вэнэсуэльскую нафту (своп-зьдзелка).

Узгадка Лукашэнкам АДКБ тлумачыцца тым, што разам зь Беларусьсю ў гэтую арганізацыю ўваходзіць Армэнія, якая мае тэрытарыяльны канфлікт з Азэрбайджанам, стасункі Ерэвана з Баку балянсуюць на мяжы вайны. Пры гэтым Азэрбайджан не зьяўляецца сябрам АДКБ.

Ваша меркаваньне

Паказаць камэнтары

XS
SM
MD
LG