Лінкі ўнівэрсальнага доступу

Адвакат Байковай атрымаў штраф памерам 8.750.000 рублёў

  • БелаПАН

Міхаіл Воўчак

Міхаіл Воўчак

11 траўня ў судзе Маскоўскага раёну Менску абвешчаны прысуд былому адвакату Міхаілу Воўчаку. Судзьдзя Алена Рудніцкая прызнала яго вінаватым у разгалошваньні дадзеных папярэдняга расьсьледаваньня і прысудзіла выплаціць штраф у 250 базавых велічынь (8.750.000 рублёў).

Да уступленьня прысуду ў законную сілу з Воўчака ўзятая падпіска аб нявыезьдзе.

70-гадовы пэнсіянэр абвінавачваўся паводле часткі 1 артыкулу 407 Крымінальнага кодэксу (разгалашэньне дадзеных дазнаньня, папярэдняга сьледзтва або закрытага судовага паседжаньня). Яму інкрымінавалася перадача карэспандэнту БелаПАН фотакопій пратаколаў праслухоўваньня Камітэтам Дзяржаўнай Бясьпекі тэлефонных перамоваў паміж абвінавачваным у стварэньні злачыннай арганізацыі грамадзянінам ФРГ і сьледчым МУС, які зьяўляўся членам сьледчай групы старэйшага сьледчага па асабліва важных справах Генэральнай пракуратуры Сьвятланы Байковай. Байкова была апошняй падабароннай Міхаіла Воўчака ў яго адвакацкай практыцы.

Камэнтуючы прысуд Воўчак сказаў:

"Гэты прысуд павінен быць прызнаны незаконным і неабгрунтаваным. Будзе пададзеная касацыйная скарга ў Менскі гарадзкі суд. Ці падтрымае яго гэтая першая інстанцыя ці не падтрымае, ня ведаю. Асуджэньне па гэтым артыкуле мяне, як былога адваката, аб чым кажа? Перш за ўсё гэта зьвязана з маёй працай па абароне Байковай. З бескампраміснай пазыцыяй і абвяшчэньнем усіх дадзеных, якія мне вядомыя, аб злачыннай дзейнасьці любых службовых асобаў, у тым ліку і КДБ. Я пра гэта кажу публічна і буду казаць".

Паводле перакананьня Міхаіла Воўчака, усялякі ціск на адваката выбівае яго з каляіны, пазбаўляе магчымасьці ў поўную сілу абараняць свайго падабароннага.

Каб выплаціць прысуджаны яму штраф, Воўчаку трэба аддаць усю яго пэнсію за 12,5 месяца.
XS
SM
MD
LG