Лінкі ўнівэрсальнага доступу

“Беларусбанк” будзе прадаваць валюту на сацыяльныя мэты па чарзе


Нацыянальны банк Беларусі даручыў найбуйнейшаму беларускаму банку ААТ "ААБ Беларусбанк" прадаваць фізычным асобам наяўную замежную валюту на сацыяльныя мэты ў парадку чарговасьці, паведаміў начальнік управы інфармацыі - прэс-сакратар Нацбанку Анатоль Драздоў.

"Нацыянальны банк 27 красавіка накіраваў у “Беларусбанк” ліст, у адпаведнасьці зь якім, гэтаму банку дазволена адразу не прадаваць набытую ў пунктах абмену валют на памежных пераходах замежную валюту. Гэтыя валютныя сродкі будуць канцэнтравацца і накіроўвацца на сацыяльна-значныя выдаткі нашых грамадзян за мяжой: на лячэньне, аплату навучаньня і пражываньне студэнтаў, выезд у сувязі з хваробай або сьмерцю сваякоў і іншыя мэты ", – сказаў А. Драздоў. "Валюта на гэтыя мэты павінна прадавацца грамадзянам на падставе іх заяў. Пэўны парадак продажу валюты, у рамках дадзенага распараджэньня, “Беларусбанк” вызначыць самастойна", – дадаў ён.

У “Беларусбанку” пацьвердзілі, што ў цяперашні час вядзецца падрыхтоўка адпаведнага лякальнага нарматыўнага акту банку.

Паводле словаў прадстаўніка банку, мяркуецца, што будуць вызначаны дакладныя крытэрыі продажу наяўнай замежнай валюты на сацыяльна-значныя патрэбы. Пры гэтым фармулёўкі "і іншыя мэты" ў дакумэньце ня будзе.

Банк таксама не плянуе устанаўліваць ліміты продажу ў залежнасьці ад мэтаў набыцьця валюты. Заяўкі будуць разглядацца ў парадку чарговасьці і іх задавальненьне будзе ажыцьцяўляцца зыходзячы з наяўнага аб'ёму сродкаў для продажу.

Асноўным крытэрыем пры прыняцьці рашэньня аб продажы наяўнай валюты стане абгрунтаванасьць і дакладнасьць прадстаўленых заяўнікам дакумэнтаў. У банку таксама заяўляюць, што пры прыняцьці рашэньняў будуць кіравацца выразнымі юрыдычнымі азначэньнямі, напрыклад, пры заяўцы на выезд у сувязі зь цяжкай хваробай сваякоў. "Пры прастудзе замежных сваякоў, вядома, заяўка задавальняцца ня будзе. Падставай для куплі валюты ў “Беларусбанку”, у прыватнасьці, стане менавіта цяжкая хвароба сваякоў, пад гэта вызначэньне юрыдычна трапляе дакладны пералік дыягназаў", - сказаў прадстаўнік банку.

Паводле яго словаў, канчатковае рашэньне аб пазачарговай продажы наяўнай замежнай валюты, на падставе пададзеных заяў, будзе прымацца калегіяльна на пасяджэньні фінансавага камітэту “Беларусбанка”.

У банку таксама паведамілі, што заяўку на пазачарговую куплю валюты па курсе, які не больш чым на 2% перавышае афіцыйны курс Нацбанку, можна будзе падаць і ў рэгіянальных аддзяленьнях “Беларусбанку”, але рашэньне будзе прымацца яго цэнтральным апаратам.

Ваша меркаваньне

Паказаць камэнтары

XS
SM
MD
LG