Лінкі ўнівэрсальнага доступу

Папулярны міністар абароны Нямеччыны Карл-Тэадор цу Гутэнбэрг, падаў у адстаўку ў сувязі з абвінавачваньнямі, што частка ягонай доктарскай дысэртацыі зьяўляецца плягіятам. Яго адстаўка – сур'ёзны ўдар па пазыцыях канцлера Ангелы Мэркэль і яе партыі, якая рыхтуецца да мясцовых выбараў у трох землях Нямеччыны ў сакавіку.

39-гадовы арыстакрат і былы міністар эканомікі Карл-Тэадор цу Гутэнбэрг, якога абвінавацілі ў тым, што частка ягонай доктарскай дысэртацыі з’яўляецца плягіятам, паведаміў сёньня на прэсавай канфэрэнцыі, што рашэньне аб адстаўцы было "самым балючым рашэньнем у яго жыцьці".

На мінулым тыдні ўнівэрсытэт Байройта пазбавіў Гутэнбэрга званьня доктара пасьля таго, як ён прызнаўся, што ў яго дысэртацыі былі "недахопы". Першапачаткова ён адкідаў абвінавачваньні ў плягіяце як "абсурдныя".

Былы міністар папрасіў прабачэньня ва ўнівэрсытэта, хаця наўпрост і не прызнаў слушнасьць абвінавачваньняў.

Нямецкія СМІ, аднак, паведаміў, што шматлікія кавалкі дысэртацыі Гутэнбэрга пра разьвіцьцё канстытуцыйнага права ў Эўразьвязе і ЗША, абароненай у 2006 годзе, былі ўзятыя са старых газэтных артыкулаў і іншых навуковых публікацый, без належных спасылак.

Гутэнбэрг сёньня прызнаў, што скандал, падчас якога прэса дала яму мянушкі "барон Cut-And-Paste" (выразаць і ўставіць) і "Цу Гуглбэрг" (ад назвы пошукавай сыстэмы Google), дабіў яго: "Я заўсёды быў гатовы змагацца, але я дасягнуў мяжы сваіх сілаў".

Былы міністар паведаміў, што скандал вакол яго дысэртацыі забіраў у яго шмат часу і пагражаў сарваць плян рэформы бундэсвэру. Гутэнбэрг падкрэсьліў, што вырашыў сысьці ў адстаўку, каб прадухіліць далейшую шкоду ад скандалу: “Як і ўсе людзі, я павінен прызнаваць мае слабасьці і памылкі”.

Паводле ацэнак назіральнікаў, Карл-Тэадор, разам са сваёй жонкай Стэфані – прапраўнучкай легендарнага канцлера Нямеччыны Ота фон Бісмарка, быў глямурнай постацьцю ў шэрым сьвеце нямецкай палітыкі.

Яго адстаўка зьяўляецца сур'ёзным ударам па канцлеру Ангеле Мэркэль, якая падтрымлівала Гутэнберга на працягу ўсяго скандалу. Учора быў абнародаваны адкрыты ліст 23 тысяч навукоўцаў і грамадзкіх дзеячоў з асуджэньнем канцлера за яе спробы абараніць свайго міністра.

Яго рашэньне сысьці ў адстаўку прыпала як раз на момант, калі Хрысьціянска-дэмакратычны саюз рыхтуе да выбараў у трох землях Нямеччыны ў сакавіку, у тым ліку ў паўднёва-заходняй зямлі Бадэн-Вюртэмбэрг, бастыёне кансэрватыўнай партыі. Апытаньні паказваюць, што ХДС можа там атрымаць паразу.

Але адстаўка Гутэнбэрга не азначае, што ён сыходзіць з палітыкі. Апытаньні грамадзкай думкі паказваюць, што скандал не моцна пашкодзіў яго папулярнасьці сярод немцаў, большасьць зь якіх хацела б, каб ён застаўся на пасадзе міністра.

Ваша меркаваньне

Паказаць камэнтары

XS
SM
MD
LG