Лінкі ўнівэрсальнага доступу

Азараў патлумачыў недалучэньне Кіева да міжнароднай заявы па Беларусі


Польскі прэм’ер-міністар Дональд Туск і яго ўкраінскі калега Мікола Азараў на прэсавай канфэрэнцыі пасьля саміту «Вышаградскай чацьвёркі»

Польскі прэм’ер-міністар Дональд Туск і яго ўкраінскі калега Мікола Азараў на прэсавай канфэрэнцыі пасьля саміту «Вышаградскай чацьвёркі»

Такую заяву з асуджэньнем парушэньня правоў чалавека ў Беларусі зрабілі сёньня на саміце «Вышаградскай чацьвёркі» ў Браціславе кіраўнікі ўрадаў Нямеччыны, Аўстрыі, Польшчы, Славаччыны, Вугоршчыны і Чэхіі. Украінская дэлегацыя, якая таксама ўдзельнічала ў сустрэчы, да гэтай заявы не далучылася.

У размове з журналістамі прэм’ер-міністар Украіны Мікола Азараў патлумачыў:

«Такія дакумэнты ствараюцца не за пяць хвілін. А Ўкраіна атрымала тэкст гэтага пагадненьня сёньня раніцай. Ёсьць адпаведная працэдура разгляду такіх заяў, калі краіна падпісваецца пад пэўнай заявай».

Пры гэтым украінскі прэм’ер таксама адзначыў, што Ўкраіна з улікам яе добрых стасункаў зь Беларусьсю можа іншымі сродкамі паўплываць на сытуацыю з правамі чалавека ў гэтай краіне.

«Беларусь, па-першае, — краіна, зь якой у нас усе межы адкрытыя, існуе дагавор аб свабодным гандлі, мы найбліжэйшыя суседзі, і тое, што адбываецца ў Беларусі, ня можа нас не хваляваць. Гэты клопат, улічваючы ацэнкі , якія цяпер даюцца эўрапейскімі краінамі, мы можам данесьці да кіраўніцтва Беларусі іншымі спосабамі, і гэта мы, дарэчы, і робім», — адзначыў Азараў.

Паводле словаў Азарава, Украіна лічыць, што дыялёг зможа прынесьці больш карысьці, чым падпісаны дакумэнт, які ўкраінскі бок ня меў магчымасьці дэталёва вывучыць.

Паказаць камэнтары

XS
SM
MD
LG