Лінкі ўнівэрсальнага доступу

Літва і Латвія дамовіліся супраць Газпрому


Літва ня будзе перашкаджаць латвійскаму праекту пабудовы тэрміналу для рэгазыфікацыі звадкаванага газу, але не адмаўляецца і ад плянаў уласнага тэрміналу – меншай магутнасьці. З такой заявай выступіла сёньня прэзыдэнт Літвы Даля Грыбаўскайце па выніках сустрэчы ў Вільні са сваім латвійскім калегам Валдзісам Затлерсам.

Пляны пабудовы ўласнага тэрміналу маюць усе краіны Балтыі, але Латвія дамагаецца, каб яе праект быў прызнаны прыярытэтам, што абумоўлівае яго фінансаваньне з фондаў ЭЗ, нагадвае агенцтва Delfi.

Сваю падтрымку латвійскаму праекту Грыбаўскайце, аднак, пацьвердзіла пасьля таго, як латвійскі бок паабяцаў, што пабудовай тэрміналу будзе займацца дзяржаўная кампанія Latvenergo, а не прыватны падрадчык.

"Гэта дасьць гарантыі бясьпекі абедзьвюм краінам, каб у будучыні гэтыя кампаніі не патрапілі ў рукі дастаўцу, якому мы шукаем альтэрнатыву", – патлумачыла Грыбаўскайце сваю пазыцыю.

Вялікую зацікаўленасьць у латвійскім праекце выказвае кампанія Itera Latvija, якая належыць расейскаму Газпрому.

Акрамя таго Грыбаўскайце агучыла пляны аб'яднаць балтыйскія інфраструктуры і газаправоды з Паўночнымі краінамі і Польшчай.

Прэзыдэнт Латвіі, у сваю чаргу, пацьвердзіў падтрымку Рыгі праекту літоўскай атамнай электрастанцыі.
XS
SM
MD
LG