Лінкі ўнівэрсальнага доступу

Адвакат Гараева, якая адмовілася абараняць Ірыну Халіп: «Ніякага ціску не было»


Ірына Халіп

Ірына Халіп

Чаму адвакат Тамара Гараева адмовілася абараняць журналістку Ірыну Халіп? Вязьням «амэрыканкі» круцяць прапагандысцкі сэрыял «Найноўшая гісторыя». Сьпіс абвінавачаных па справе 19 сьнежня папоўніўся яшчэ 4-ма прозьвішчамі.

4 лютага адвакат Ірыны Халіп Тамара Гараева праінфармавала бацькоў журналісткі, што мусіць разарваць кантракт аб абароне Ірыны. Жонку экс-кандыдата ў прэзыдэнты Андрэя Саньнікава трымаюць пад хатнім арыштам, яна абвінавачваецца ва ўдзеле ў масавых беспарадках 19 сьнежня. Уладзімер Халіп, бацька журналісткі, мяркуе, што вакол дачкі адмыслова ствараюць «мёртвую зону».

Карэспандэнт: «А якія матывы ў яе?»

Уладзімер Халіп: «Ніякіх матываў, маўчыць пра гэта. Зразумела, якія матывы. Як было і зь першым адвакатам. Ад першага Ірыну прымусілі адмовіцца, бо ім не падабаецца… Яны хочуць загнаць яе ў такую пастку, каб ёй нічога не засталося, акрамя афіцыйнага адваката, якога прызначаць улады».

Калі Ірыну Халіп трымалі ў турме КДБ, яе абараняў адвакат Уладзімер Тоўсьцік. Паводле Ўладзімера Халіпа, улады пагражалі забраць у адваката ліцэнзію, калі Ірына ад яго не адмовіцца. У выніку журналістка знайшла новага абаронцу — Тамару Гараеву, зь якой ужо была заключаная дамова. Цяпер і гэты адвакат ня можа прыйсьці на дапамогу жонцы былога кандыдата ў прэзыдэнты Андрэя Саньнікава.

Тэлефаную ў юрыдычную кансультацыю № 2 Савецкага раёну Менску, дзе працуе адвакат Тамара Гараева. Спадарыня Гараева кажа, што ціску на яе, каб адмовілася абараняць Ірыну Халіп, не было, і спасылаецца на занятасьць. Прызнае, што тое, што будзе занятая, яна высьветліла ўжо пасьля заключэньня дамовы з журналісткай:

У мяне ёсьць іншая праца, якую мне цяжка было б сумясьціць.
«У мяне ёсьць іншая праца, якую мне цяжка было б сумясьціць. Я проста пагадзілася… Ня тое каб пасьпешліва, тут я разумела, якая сытуацыя, але потым зразумела, што ў мяне не атрымаецца спалучаць… Я сама прыняла такое рашэньне».

Паводле Ўладзімера Халіпа, знайсьці зараз новага адваката складана: «Усіх добрых адвакатаў разабралі, бо столькі людзей арыштавана…»

Уладзімер Палажанка, бацька Насты Палажанкі, якую працягваюць трымаць у ізалятары КДБ, атрымаў па пошце паштоўкі з арганізацыі «Міжнародная амністыя». Паштоўкі напісаныя на ангельскай, нямецкай і расейскай мовах.

«Жадаем вам сілы ў гэтыя цяжкія часы і мы думаем пра вас. Хочам, каб вы ўспрынялі гэтую паштоўку як знак салідарнасьці і спадзяваліся, што Анастасія Палажанка ды іншыя вязьні хутка будуць на волі».

Ад самой Насты Палажанкі лістоў па-ранейшаму няма, адваката да яе зноў не дапусьцілі, паведаміў бацька арыштаванай актывісткі «Маладога фронту».

Жонка каардынатара «Эўрапейскай Беларусі» Зьмітра Бандарэнкі Вольга таксама не атрымала ліста ад мужа і паведаміла, што да яго зноў не пусьцілі адваката. Вольга Бандарэнка, якая прадстаўляе грамадзкі камітэт «Вызваленьне», мяркуе, што гэтая сытуацыя зьвязаная з рэакцыяй Эўразьвязу на падзеі ў Менску.
Пасьля гэтых санкцый бачна, што беларускі рэжым уздыхнуў вольна і пачаў зноў закручваць гайкі ўнутры краіны.

«Невялікі ручай — не, гэта гучна сказана: не ручай, а кропелькі лістоў — для большасьці з нас спыніўся адразу пасьля 31 студзеня. І адвакатаў таксама не пускаюць. Такім чынам, дзякуй Эўразьвязу. Відаць, гэта і ёсьць адказ беларускіх уладаў на санкцыі Эўразьвязу. Пасьля гэтых санкцый бачна, што беларускі рэжым уздыхнуў вольна і пачаў зноў закручваць гайкі ўнутры краіны».

4 лютага, пасьля тыдня маўчаньня, атрымала ліст ад мужа Мілана Міхалевіч. Жонка экс-кандыдата ў прэзыдэнты паведаміла, што Алесь ня скардзіцца на здароўе, піша, што шмат чытае і зараз можа глядзець тэлевізар.

«Пад вечар тут сталі ставіць DVD. Ужо прагледзеў усе сэрыі „Найноўшай гісторыі“ Казіяткі і некалькі амэрыканскіх фільмаў».

Тым часам колькасьць абвінавачаных ва ўдзеле ў масавых непарадках 19 сьнежня павялічылася яшчэ на 4 чалавекі: гэта Алесь Кіркевіч, Зьміцер Дрозд, Сяргей Казакоў, Уладзь Яроменак. Агулам у сьпісе абвінавачаных ужо 43 чалавекі.

Паказаць камэнтары

XS
SM
MD
LG