Лінкі ўнівэрсальнага доступу

Адседзеў за Плошчу — рыхтуйся да адлічэньня


Няглядзячы на запэўніваньні новаабранага міністра адукацыі Сяргея Маскевіча, што студэнтаў, якія бралі ўдзел у апазыцыйнай акцыі 19 сьнежня, адлічваць з ВНУ ня будуць, факты сьведчаць пра адваротнае.

На чарговай сэсіі выкладчыкі пад надуманымі прычынамі могуць "заваліць" дзясяткі навучэнцаў. Мала таго, пад звальненьні трапляюць і выкладчыкі, якія 19 сьнежня асьмеліліся выйсьці на дэманстрацыю ў Менску.

Студэнтцы І курсу гістарычнага факультэту Беларускага дзяржаўнага пэдагагічнага ўнівэрсытэту Тацяне Грыбоўскай паведамілі, што яе адлічылі з ВНУ за "непасьпяховасьць". Сапраўднай прычынай рашэньня, як лічыць дзяўчына, стала яе прысутнасьць на плошчы Незалежнасьці і 10-суткавы арышт пасьля гэтага. Заліковую сэсію і два іспыты яна здала без праблемаў, але наступныя выпрабаваньні суправаджаліся кпінамі — маўляў, нармальныя студэнты вучацца, а не па плошчах ходзяць.

Аналягічная сытуацыя — яшчэ ў аднаго першакурсьніка, студэнта Беларускага дзяржаўнага ўнівэрсытэту інфарматыкі і радыёэлектронікі Арцёма Хвасьцюка:

Спачатку як бы далі сэсію здаваць, а потым самі ж мне яе і завалілі
"Наконт магчымага навучаньня не перагледжана нічога — нібыта "акадэмічная непасьпяховасьць". Адпаведны загад абяцаюць падпісаць да канца тыдня. Спачатку як бы далі сэсію здаваць, а потым самі ж мне яе і завалілі. Яшчэ дэкан нават казаў, што ня мае права мяне адлічыць, але, груба кажучы, проста наглым чынам хлусіў у вочы. Канечне, доказаў і фактаў, што мяне засаджваюць, няма. Аднак насамрэч так яно і ёсьць".

Нашмат крыўдней, калі студэнта намагаюцца выштурхнуць з апошняга курсу. Як у выпадку Андрэем Лугіным, выпускніком факультэту эстэтычнай адукацыі Беларускага дзяржаўнага пэдагагічнага ўнівэрсытэту:

Фармальна мяне адлічылі не за Плошчу. Афіцыйна прыгразілі адлічэньнем за тое, што я ня здаў залік
"Фармальна мяне адлічылі не за Плошчу. Афіцыйна прыгразілі адлічэньнем за тое, што я ня здаў залік. І гэта як быццам аргумэнт на карысьць выключэньня, хоць насамрэч гэта здарылася зусім зь іншай прычыны. Загаду на адлічэньне пакуль што ня бачыў — у панядзелак, спадзяюся, усё стане канчаткова зразумела".

У камітэце абароны рэпрэсаваных "Салідарнасьць" паведамілі, што ў справе адлічэньня з палітычных матываў да іх зьвярнулася больш за 20 чалавек. Адных ужо адлічылі, іншым толькі пагражаюць. Гаворыць намесьніца старшыні Эніра Браніцкая:

На дадзены момант у нас з загадамі на адлічэньне толькі тры чалавекі. Але яшчэ каля двух дзясяткаў людзей, якія прыходзяць і кажуць: маўляў, сытуацыя такая, што папярэдзілі — у панядзелак адлічаюць
"Людзі зьвяртаюцца, але сытуацыя неадназначная. Ім кажуць: вы адлічаныя. Але фармальна, да таго моманту, пакуль іх не азнаёмілі з загадам аб адлічэньні, яны ня лічацца адлічанымі. На дадзены момант у нас з загадамі на адлічэньне толькі тры чалавекі. Але яшчэ каля двух дзясяткаў людзей, якія прыходзяць і кажуць: маўляў, сытуацыя такая, што папярэдзілі — у панядзелак адлічаюць. У той жа час некаторым студэнтам пасьля таго, як яны пачынаюць даваць інтэрвію, тэлефануюць з дэканатаў і кажуць: вы ж яшчэ не адлічаныя… Але зараз заканчваецца сэсія, і думаю, што некаторыя ўсё ж будуць адлічаныя на той падставе, што проста не пасьпелі здаць залікі".

Хваля рэпрэсіяў дакацілася і да выкладчыкаў. За ўдзел у мітынгу апазыцыі адміністрацыя Беларускага нацыянальнага тэхнічнага ўнівэрсытэту разьвіталася, без перабольшаньня, са сваім самым вядомым кадрам — Андрэем Вількіным. Дацэнт катэдры фізычнага выхаваньня, старшыня фэдэрацыі каратэ-шотакан і прызэр усясьветнага першынства — адзін з самых пасьпяховых беларускіх трэнэраў, які выхаваў 13 чэмпіёнаў сьвету і 15 чэмпіёнаў Эўропы. 19 сьнежня ён быў арыштаваны, адседзеў 15 сутак у СІЗА ў Жодзіне. Кажа, што пакуль не гатовы камэнтаваць такі жыцьцёвы паварот:

"За тэлефанаваньне — дзякуй. Але, ведаеце, я пакуль што не гатовы даваць ніякія камэнтары…"

Пра магчымасьць уладкаваць выключаных з палітычных матываў беларускіх студэнтаў ужо заявілі навучальныя ўстановы Польшчы, Літвы і Ўкраіны. Актывістка дэмакратычнага руху Вольга Класкоўская, якая апошнім часам жыве ў Стакгольме, кажа, што далучыцца да ініцыятывы можа і Швэцыя:

Я размаўляла з дэпутатам парлямэнту Швэцыі, гэта Крысьціян Холм. І ён сказаў, што зьбіраецца ўздымаць пытаньне беларускіх студэнтаў, адлічаных з ВНУ за апошнія акцыі
"Я размаўляла з дэпутатам парлямэнту Швэцыі, гэта Крысьціян Холм. І ён сказаў, што зьбіраецца ўздымаць пытаньне беларускіх студэнтаў, адлічаных з ВНУ за апошнія акцыі. Іншымі словамі, будзе хадайнічаць перад сваім урадам адносна таго, каб нашы студэнты маглі працягнуць навучаньне ў Швэцыі. І таксама будзе акцэнтавацца на тым, як канкрэтна падтрымаць сем'і палітвязьняў. Бо сапраўды хочацца, каб важныя рэчы ажыцьцяўляліся практычна".

У сваю чаргу, Міністэрства адукацыі Беларусі абвясьціла пра намер перавесьці студэнтаў і навучэнцаў сярэдніх спэцыяльных установаў на кантрактную сыстэму, пры якой любая праява палітычнай актыўнасьці пацягне за сабой неадкладны разрыў дамовы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG