Лінкі ўнівэрсальнага доступу

logo-print
Магчымыя санкцыі з боку ЗША ў дачыненьні да Беларусі будуць скіраваныя толькі на тых, хто непасрэдна ўдзельнічаў у палітычных рэпрэсіях у Беларусі, яны ня будуць ні ў якім разе накіраваныя супраць беларускага народу. Пра гэта заявіў сёньня на прэсавай канфэрэнцыі ў Менску намесьнік памочніка дзяржсакратара ЗША Томас Мэлія.

Амэрыканскі дыплямат, які тры дні знаходзіўся ў Беларусі, яшчэ ва ўступным слове падкрэсьліў: яго візыт — незвычайны. Томас Мэлія прыляцеў у Менск на асабістае даручэньне дзяржсакратара ЗША Гілары Клінтан. Яна накіравала спадара Мэлія зь дзьвюма мэтамі — перадаць пэўны мэсыдж беларускаму ўраду і сустрэцца з прадстаўнікамі грамадзянскай супольнасьці і палітычных арганізацый.

Пра сутнасьць пасланьня з Вашынгтону амэрыканскі дыплямат сказаў так:

Томас Мэлія
"Мэсыдж ураду вельмі просты. Мы працягнулі руку дружбы і прапанавалі пашырыць наша двухбаковае супрацоўніцтва. І, як мы казалі ўжо шмат разоў, пашырэньне нашых дачыненьняў залежыць ад сытуацыі з правамі чалавека і ад паляпшэньня дэмакратычных і палітычных працэсаў у Беларусі".

На пытаньні журналістаў, што неабходна зрабіць беларускім уладам, каб пазьбегнуць санкцыяў, высокапастаўлены амэрыканскі дыплямат заявіў наступнае:

"Вызваліць усіх, хто знаходзіцца ў турмах пасьля падзеяў 19 сьнежня. Зьняць усе абвінавачваньні зь іх і з тых, хто не знаходзіцца ў зьняволеньні".

Томас Мэлія сказаў, што Вашынгтон і Брусэль увесь час вядуць кансультацыі наконт магчымых санкцыяў. Ён сам на мінулым тыдні два дні прабыў у Брусэлі. Хто раней выкажа сваё рашэньне? — спыталіся ў амэрыканскага дыплямата. Адказ яго прагучаў так:

"Мы ўзгадняем нашу пазыцыю з пазыцыяй эўрапейцаў. Яны могуць быць абвешчаныя ў адзін і той жа дзень. Аднак я не магу гэтага абяцаць.

І вельмі шмат зараз робіцца дзеля таго, каб гэтыя санкцыі былі вельмі кропкавымі".

Міжнародны аглядальнік Раман Якаўлеўскі згадвае, што Злучаныя Штаты ў свой час прынялі спэцыяльны закон, які тычыцца толькі Беларусі — "Акт аб дэмакратыі ў Беларусі":

Раман Якаўлеўскі
"Дзейнасьць гэтага закону штогод працягваецца. Штогод ён кладзецца на стол прэзыдэнта ЗША. І той штогод прымае рашэньне аб яго пралангацыі. А ўжо спэцыфіка ўжываньня гэтага закону ў тым, што яго не абавязкова выконваць у поўным аб'ёме. Калі адбываецца нешта станоўчае зь беларускага боку, то гэта ўлічваецца. Дык зараз усё, падобна, ідзе да таго, што закон пачне дзейнічаць цалкам".

Ваша меркаваньне

Паказаць камэнтары

XS
SM
MD
LG