Лінкі ўнівэрсальнага доступу

Як паведамляе БелаПАН, прысутнасьць журналістаў на інаўгурацыі Аляксандра Лукашэнкі на пасаду прэзыдэнта Рэспублікі Беларусь не прадугледжана. Будзе арганізавана прамая тэлетрансьляцыя гэтай цырымоніі.

Як паведамлялася раней, інаўгурацыя пройдзе ў Палацы Рэспублікі 21 студзеня. Варта адзначыць, што афіцыйна дата цырымоніі не паведамлялася.

Выбары кіраўніка дзяржавы прайшлі ў Беларусі 19 сьнежня 2010 года. У адпаведнасьці з Канстытуцыяй прысягу абраны прэзыдэнт павінен прынесьці не пазьней як праз два месяцы з дня абраньня, гэта значыць не пазьней за 19 лютага 2011 года.

Прысяга прыносіцца ва ўрачыстых умовах у прысутнасьці дэпутатаў Палаты прадстаўнікоў, членаў Савета Рэспублікі, судзьдзяў Канстытуцыйнага, Вярхоўнага і Вышэйшага гаспадарчага судоў.

На інаўгурацыі кіраўнік дзяржавы прамаўляе клятву: "Уступаючы на пасаду прэзыдэнта Рэспублікі Беларусь, урачыста клянуся аддана служыць народу Рэспублікі Беларусь, паважаць і ахоўваць правы і свабоды чалавека і грамадзяніна, выконваць і абараняць Канстытуцыю Рэспублікі Беларусь, сьвята і добрасумленна выконваць ускладзеныя на мяне высокія абавязкі".

Пазьней кіраўнік прэсавай службы А.Лукашэнкі Павал Лёгкі ў інтэрвію "Интерфаксу" абверг інфармацыю пра тое, што журналісты ня змогуць прысутнічаць на інаўгурацыі абранага прэзыдэнта Беларусі.

"Тое, што журналістаў нібыта не запрашаюць на інаўгурацыю прэзыдэнта, гэта адно з двух: альбо трызьненьне запалёнай сьвядомасьці, альбо элемэнтарная правакацыя", - адзначыў кіраўнік прэсавай службы.

Паводле сп-ра Лёгкага "акрамя таго, што інаўгурацыя будзе трансьлявацца ў прамым тэле-і радыёэфіры, журналісты, па сваім жаданьні, змогуць знаходзіцца і на месцы падзеі".

Ваша меркаваньне

Паказаць камэнтары

XS
SM
MD
LG