Лінкі ўнівэрсальнага доступу

Лукашэнка рыхтуецца да інаўгурацыі


Цырымонія інаўгурацыі, 2006 год.

Цырымонія інаўгурацыі, 2006 год.

Інаўгурацыя Аляксандра Лукашэнкі можа адбыцца 21 студзеня. Пра гэта «Свабодзе» сёньня паведаміў сакратар Цэнтральнай выбарчай камісіі Беларусі Мікалай Лазавік. І хоць гэтая дата названая папярэдняй, падрыхтоўка да цырымоніі ўжо пачалася.

Канстытуцыя Беларусі прадугледжвае: абраны кіраўнік дзяржавы заступае на пасаду пасьля прынясеньня прысягі. Канчатковую дату інаўгурацыі звычайна вызначае прэзыдэнцкая адміністрацыя. Адзінае абмежаваньне тут — цырымонія павінна адбыцца не пазьней як праз два месяцы пасьля выбараў, кажа сакратар Цэнтравыбаркаму Мікалай Лазавік:

«У адпаведнасьці з Канстытуцыяй абраны прэзыдэнт Рэспублікі Беларусь павінен прыняць прысягу цягам двух месяцаў пасьля дня выбараў. Гэта значыць — да 19 лютага. І час яшчэ ёсьць. Але, наколькі я ведаю, ужо вядзецца папярэдняя прапрацоўка сцэнару інаўгурацыі. Абмяркоўвалася дата — 21 студзеня.

Гэта рабочая дата, якая ня ўзгодненая яшчэ з кіраўніком дзяржавы. Аднак напрацоўкі вядуцца. І, хутчэй за ўсё, гэтая дата і будзе асноўнай».

Тым часам пасьля прэсавай канфэрэнцыі 20 сьнежня Аляксандар Лукашэнка амаль зьнік з экранаў Беларускага тэлебачаньня. Гэтаксама было і пасьля папярэдніх выбараў. У чым тут справа? Ці гэта стомленасьць пасьля выбарчай кампаніі? Ці, можа, Лукашэнка выехаў кудысьці адпачываць? А можа, гэта палітыка новага кіраўніка БТ? На пытаньні, якія задаюць у гэтыя дні слухачы «Свабоды», я сёньня папрасіў адказаць Паўла Лёгкага — кіраўніка прэсавай службы Аляксандра Лукашэнкі:

Вы перажываеце?! Кіраўнік дзяржавы на два дні з экрану зьнік. Бяда такая ў вас.
«Вы перажываеце?! Кіраўнік дзяржавы на два дні з экрану зьнік. Бяда такая ў вас. На мой погляд, у выходныя дні гледачы ды слухачы (вашыя, у кожным разе) ня вельмі турбуюцца пра палітычныя падзеі ў нашай краіне.

Прэзыдэнт знаходзіцца ў Менску. Ён працуе ў звычайным сваім рэжыме. І ўжо сёньня вы даведаецеся, якія мерапрыемствы былі ў кіраўніка дзяржавы».

У 2006 годзе Аляксандар Лукашэнка цягнуў з інаўгурацыяй — цырымонія двойчы пераносілася. Хадзілі нават чуткі, , што гэта магло быць зьвязана з пагаршэньнем здароўя Лукашэнкі. Прысягу і праграмную прамову тады ў вялікай зале Палаца рэспублікі слухалі 2600 гасьцей. Цырымонія трансьлявалася ў жывым эфіры па ўсіх тэле- і радыёканалах. Аднак тады ніводзін лідэр замежных дзяржаў на ўрачыстасьцях у Менску не прысутнічаў. Не было і афіцыйных прадстаўнікоў Крамля.

Праз 15 хвілін Лукашэнка выйшаў на Кастрычніцкую плошчу ўжо ў генэральскай форме. У другой палове дня на плошчы з нагоды інаўгурацыі адбыўся канцэрт

Палітоляг Аляксандар Класкоўскі таксама згадвае, што ў 2006 годзе дата інаўгурацыі пераносілася:

«І тады было шмат кулюарных размоваў пра тое, што Плошча моцна паўплывала на эмацыйны, псыхалягічны стан афіцыйнага пераможцы тых выбараў. Гэтым разам Плошча была яшчэ больш драматычнай. А рэакцыя Эўропы — яшчэ больш абвостранай. Таму я думаю, што афіцыйны лідэр, як чалавек эмацыйны, прыняў гэта блізка да сэрца. І, напэўна, гэта адбілася на тым, што яго актыўнасьць зараз мінімальная. Тым болей, што Эўропа і ўласная грамадзкасьць паставілі вельмі нязручныя пытаньні. І на іх трэба адказваць.

А адказваць так, як гэта робіцца цяпер у афіцыйных мэдыях, дзе ідзе гульня ў адны вароты, — гэта, мякка кажучы, непераканаўча».

Паказаць камэнтары

XS
SM
MD
LG