Лінкі ўнівэрсальнага доступу

Пра што папросіць Эўропу Аляксандар Мілінкевіч?


12 студзеня ў Эўрапарлямэнце пройдзе адмысловае паседжаньне па сытуацыі ў Беларусі. Па беларускім пытаньні выступяць камісар у пытаньнях пашырэньня і эўрапейскай палітыкі добрасуседзтва Штэфан Фюле, кіраўнік місіі БДІПЧ АБСЭ на выбарах 2010 году Герт Арэнс і намесьнік міністра замежных спраў Літвы, якая старшынюе ў АБСЭ, Эвальдас Ігнатавічус.

На пасяджэньне запрошаная дэлегацыя прадстаўнікоў беларускіх палітычных партый і грамадзкіх арганізацый, а таксама сваякі затрыманых па справе 19 сьнежня.

Мяркуецца, што на пасяджэньні выступіць лідэр руху «За свабоду» Аляксандар Мілінкевіч.

Як паведамляе сайт палітыка, Мілінкевіч лічыць, што ў адказ на масавае парушэньне правоў чалавека Эўразьвязу варта замарозіць адносіны з беларускімі ўладамі.

Замарожваньне стасункаў павінна ўяўляць сабой “прыпыненьне рэалізацыі праграмаў дапамогі эўрапейскіх і міжнародных фінансавых інстытуцыяў, якія рэалізуюцца праз дзяржаўныя структуры Беларусі”.

Для аднаўленьня і працягу дыялёгу з Эўразьвязам улады Беларусі павінны вызваліць усіх палітвязьняў, спыніць перасьлед дэмакратычных актывістаў і незалежных мэдыяў і аднавіць дзейнасьць Офісу АБСЭ з пашыраным мандатам, мяркуе лідэр руху “За Свабоду”.

Таксама гаворка пойдзе пра гарантыі працягу навучаньня ў краінах ЭЗ для студэнтаў, выключаных зь беларускіх унівэрсытэтаў па палітычных матывах за удзел у мірным пратэсьце 19 сьнежня.

Мілінкевіч трымаецца пазыцыі, што пэрсанальныя візавыя абмежаваньні варта значна пашырыць на фальсыфікатараў выбараў і арганізатараў рэпрэсій розных узроўняў. Будуць названыя канкрэтныя адказныя пасады.

Але найбольш эфэктыўным захадам у адказ на палітычныя рэпрэсіі рэжыму Лукашэнкі, на думку Аляксандра Мілінкевіча, “была б эфэктыўная падтрымка грамадзянскай супольнасьці і незалежных СМІ, у тым ліку тых, якія вяшчаюць на Беларусь з тэрыторыі ЭЗ. Вельмі важным пазытыўным крокам з боку Эўразьвязу стане аднабаковае зьніжэньне коштаў шэнгэнскіх візаў з 60 да 35 эўра, а таксама спрашчэньне працэдур атрыманьня іх для беларусаў”.

Паводле Мілінкевіча, сваім рашэньнем аб бясплатных нацыянальных візах для беларусаў Польшча паказвае вельмі добры прыклад для ўсяго ЭЗ.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG