На 73 годзе жыцьця пасьля працяглай хваробы памёр Іржы Дынстбір – былы чэскі дысыдэнт, міністар замежных справаў Чэхаславаччыны пасьля краху камуністычнага рэжыму ў 1989 годзе – паведамляе чэскае інфармацыйнае агенцтва ЧТК.
Апошнім часам ён быў дэпутатам верхняй палаты чэскага парлямэнту, Дынстбір быў абраны ў Сэнат ад сацыял-дэмакратычнай партыі ў 2008 годзе.
“Ён быў выдатным дзядзькам. Нашы палітычныя погляды адрозьніваліся, але гэта не перашкаджала нам сябраваць”, – кажа дзейны міністар замежных справаў Карл Шварцэнбэрг
Лідэр чэскіх сацыял-дэмакратаў Богуслаў Собатка сказаў, што сьмерць Дынстбіра зьяўляецца вялікай стратай: "Ён быў вельмі сьмелы і мудры чалавек. Я думаю, што гэта страта ня толькі для сацыял-дэмакратычнай партыі і яе сэнацкай групы, але і для ўсяго чэскага грамадзтва".
Дынстбір увайшоў у гісторыю галоўным чынам як першы міністар замежных справаў Чэхаславаччыны пасьля падзеньня камунізму, пры ім з краіны былі паступова выведзеныя савецкія акупацыйныя войскі.
У 1990-1992 гадах Дынстбір быў таксама намесьнікам старшыні чэхаславацкага фэдэральнага ўраду
Пазьней ён быў спэцыяльным дакладчыкам ААН па правах чалавека ў былой Югаславіі.
У 1958 годзе, калі ён быў студэнтам факультэта мастацтваў Карлава ўнівэрсытэту, Дынстбір уступіў у камуністычную партыя Чэхаславаччыны (КПЧ). Пазьней працаваў палітычным аглядальніка чэскага радыё.
У 1969 годзе пасьля савецкага ўварваньня ў ЧССР Дынстбір быў выключаны з кампартыі.
Ён адным зь першых падпісаў маніфэст супраціву “Хартыя-77”. Пэўны час быў рэдактарам падпольнага часопісу Čtverec.
У 1979 годзе падчас працэсу над сябрамі Камітэту дапамогі ахвярам несправядлівага перасьледу быў асуджаны да трох гадоў пазбаўленьня волі за “падрыўную дзейнасьць”.
У цяперашнім складзе Сэнату Дынстбір узначальваў камітэт па міжнародных справах, абароны і бясьпекі, а таксама камісіі па Канстытуцыі.
Са сьмерцю Дынстбіра сацыял-дэмакраты страцілі сваю большасьць ў Сэнаце, яны мелі 41 голас з 81.
Прэзыдэнт Чэхіі Вацлаў Клаўс на працягу месяца павінен абвясьціць выбары сэнатара ў выбарчай акрузе горада Кладна, дэпутатам ад якой быў Дынстбір.
