Лінкі ўнівэрсальнага доступу

Эўразьвяз рыхтуе санкцыі да беларускіх уладаў


Эўрапейскі парлямэнт 12 студзеня правядзе пазачарговае пасяджэньне па сытуацыі ў Беларусі.

"Важна, каб пасьля гвалту, які адбыўся ў Беларусі, мы працягнулі ціск на ўрад Лукашэнкі на вышэйшым узроўні", — цытуе старшыню Эўрапарлямэнту Ежы Бузэка прэс-служба гэтай эўраструктуры.

Па словах Бузэка, Эўрапарлямэнт разгледзіць ход і наступствы прэзыдэнцкіх выбараў, у тым ліку празьмернае і непрапарцыйнае ўжываньне сілы беларускімі ўладамі, зьбіцьцё і затрыманьне апазыцыйных кандыдатаў у прэзыдэнты, гвалт у дачыненьні да журналістаў і актывістаў грамадзянскай супольнасьці.

"Таксама мы абмяркуем магчымасьць далейшых рэакцый з боку Эўразьвязу", адзначыў Бузэк.

Пытаньне пра магчымыя санкцыі ў дачыненьні да Беларусі будзе ўключанае ў парадак дня пасяджэньня, паведамілі БелаПАН у прэс-службе Эўрапарлямэнту.

Рашэньне правесьці пазачарговае сумеснае пасяджэньне па сытуацыі ў Беларусі было прынята па выніках кансультацый Бузэка з кіраўнікамі шэрагу парлямэнцкіх камітэтаў і дэлегацый. У пасяджэньні возьмуць удзел прадстаўнікі камітэту Эўрапарлямэнту па замежных справах, падкамітэту па правах чалавека, дэлегацый Эўрапарлямэнту па сувязях з "Эўранэст" і Беларусьсю.

Акрамя таго, Эўрапарлямэнт плянуе запрасіць на паседжаньне шэраг лідэраў беларускай апазыцыі.

Бузэк заклікаў беларускія ўлады неадкладна вызваліць палітычных зьняволеных і спыніць гвалт.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG