Лінкі ўнівэрсальнага доступу

Старшыня Цэнтравыбаркаму Лідзія Ярмошына падчас чарговага паседжаньня камісіі выказала зьдзіўленьне, што кандыдаты на прэзыдэнта не забіраюць са складоў друкаваную прадукцыю, якая там «ляжыць ужо тыдзень». Чые ўлёткі і плякаты заляжаліся на складах друкарняў?

У штабе Андрэя Саньнікава заяўляюць, што выказваньні ЦВК ня маюць дачыненьня да іх кандыдата. Бо друкаваная прадукцыя адгружаецца, як кажуць, «з калёс», паведаміў «Свабодзе» кіраўнік штабу Ўладзімер Кобец:

«Наша прадукцыя не ляжала на складзе ані дня. Як толькі была аддрукаваная, то ў тую ж самую гадзіну была дастаўленая нам і разьмеркаваная па рэгіянальных структурах. А чыя прадукцыя ляжыць, мы ня ведаем».

Кандыдат на прэзыдэнта Алесь Міхалевіч таксама заявіў, што выказваньні Лідзіі Ярмошынай яго ня тычацца. Але не выключае, што такое можа быць:

«Я вельмі зьдзіўлены. Бо ў мяне ўсё, што друкуецца, як толькі друкарня паведамляе, што нейкая частка надрукаваная, то мы адразу забіраем, і прадукцыя абсалютна не залежваецца. Але пры дзесяці кандыдатах, можа, і ня дзіўна, што ў кагосьці з кандыдатаў такая сытуацыя ўзьнікла».

Яшчэ адзін кандыдат на прэзыдэнта Мікалай Статкевіч таксама адмаўляе факт таго, што друкаваныя матэрыялы залежваюцца:

«Па-першае, вельмі шмат намаганьняў спатрэбілася, каб надрукаваць гэтую прадукцыю. Па-другое, мая прадукцыя разабраная і разьвезеная па рэгіёнах. Мы нават часткамі забіралі, як толькі яна друкавалася».

У штабе Ўладзімера Някляева паведамляюць, што затрымкі з друкаваным матэрыяламі сапраўды ёсьць і зьвязаныя з арганізацыйнымі пытаньнямі. Але складаваньня ўлётак таксама не здаралася, кажа кіраўнік штабу Андрэй Дзьмітрыеў:

«Я ня ведаю і ня думаю, што гэта тычыцца нас. Паліграфічная прадукцыя друкуецца, хоць і ня так хутка, як таго хацелася б. Але на гэта ёсьць розныя прычыны. Але я думаю, што ўсё будзе ў парадку».

І ў іншых штабах кандыдатаў адмаўляюць тое, што друкаваныя матэрыялы доўга ляжаць на складзе. Да прыкладу, у штабе Рыгора Кастусёва. Гаворыць Сяржук Семянюк:

«Мы зьвярнуліся ў дзяржаўную друкарню, замовілі наклад і, паводле дамовы, павінны забраць учора і сёньня. Учора мы забіралі каля 300 тысяч улётак і сёньня рэшту іх, 450 тысяч. Таму якраз у нас абсалютна не залежваецца прадукцыя».

У штабе Яраслава Раманчука заяўляюць, што іх улёткі і плякаты ня толькі не заставаліся на складзе, але яшчэ і друкаваліся са спазьненьнем. Але ня выключана, што чыесьці матэрыялы сапраўды складаваліся, кажа адказны за друкаваную прадукцыю Раман Глушакоў:
Я думаю, што тут у першую чаргу ёсьць ціск на друкарні з нагоды адгрузкі.


«Праблема зусім іншая ў зьвязку з тым, што паводле тэрмінаў прадукцыя павінна быць адгружаная значна раней, чым мы яе атрымоўваем. Кандыдаты зацікаўленыя, каб яе атрымаць раней, каб давесьці свае праграмы да выбарнікаў. Я думаю, што тут у першую чаргу ёсьць ціск на друкарні з нагоды адгрузкі. Цалкам верагодна, што друкаваная прадукцыя выдрукавана і даўно ляжыць на складах».

Дзяніс Садоўскі, які адказвае за друк у штабе Віталя Рымашэўскага, паведаміў «Свабодзе», што друкаваная прадукцыя іх кандыдата, ня толькі не залежваецца, але таксама друкуецца зь перашкодамі і спазьненьнем:

«Я штодня па тры разы на дзень ежджу ў друкарню, размаўляю з дырэктарам, каб усё ж быў выдрукаваны той наклад, які мы замаўлялі. У нас нават скончылася даверанасьць, выданая ЦВК, на адгрузку гэтай прадукцыі, а яна проста ня зробленая. Прычыны банальная: ніхто ня хоча зьвязвацца з палітычным друкам, пачынаючы ад таго, хто прадае паперу, фарбу, і заканчваючы рабочым, які стаіць за станком. Пра гэта мне казаў дырэктар фабрыкі. Таму ў нас проста вельмі і вельмі нестае друкаваных матэрыялаў».

Яшчэ адзін кандыдат у прэзыдэнты Дзьмітры Вус адмовіўся пракамэнтаваць заявы старшыні ЦВК. Пра стан друкаванай прадукцыі кандыдатаў на прэзыдэнта Віктара Цярэшчанкі і Аляксандра Лукашэнкі нічога высьветліць не ўдалося.

Паказаць камэнтары

XS
SM
MD
LG