Кандыдаты разьехаліся па рэгіёнах

Апазыцыйныя кандыдаты праводзяць сустрэчы з выбарцамі ў розных гарадах Беларусі. Пакуль на перадвыбарчыя сходы прыходзіць няшмат людзей. Кандыдаты скардзяцца на тое, што мясцовая прэса ня хоча друкаваць абвесткі пра іх сустрэчы. Пра першыя ўражаньні ад сустрэч і графікі бліжэйшых паездак кандыдатаў на прэзыдэнта.

Лідэр па сустрэчах з выбарцамі ў рэгіёнах на сёньня — кандыдат ад АГП Яраслаў Раманчук, які ўжо наведаў 7 гарадоў Берасьцейскай і Менскай абласьцей. Сёньня ён у Баранавічах, а на выходных наведае Маладзечна, Оршу, Гародню. Пакуль не на ўсе такія сходы прыходзіць шмат людзей, кажа спадар Раманчук:

"Калі мы пачалі першыя спатканьні, то зразумелі, што для падрыхтоўкі сустрэчы 2 дні — гэта вельмі мала, тым больш што мясцовыя ўлады забараняюць тэлебачаньню, газэтам публікаваць рэкляму наконт гэтых сходаў. І таму толькі праз улёткі, праз кантакты даводзіцца працаваць, гэта вельмі складана. І таму прыходзіць на сходы яшчэ ня вельмі шмат людзей, але я думаю, што калі выбарчыя камісіі пачнуць працаваць згодна з законам, выконваць свае абавязкі і інфармаваць выбарцаў пра сустрэчы, тады будзе значна лепш. Апрача таго, думаю, што бліжэй да выбараў, у сьнежні, людзей на сустрэчах будзе больш".

У канцы гэтага тыдня Яраслаў Раманчук зьбіраецца наведаць і родны пасёлак Сапоцкін на Гарадзеншчыне.

Андрэй Саньнікаў учора правёў свае першыя сустрэчы ў Менскай вобласьці. У Слуцку на сходзе ў Доме культуры прысутнічала 200 чалавек, у Салігорску — каля 100. Сёньня спадар Саньнікаў у Барысаве, на выходных будзе ў Кобрыне, Баранавічах і Берасьці.

"Першыя паездкі пацьвердзілі тое, што я бачыў падчас збору подпісаў. Я быў у Слуцку і Салігорску, там ёсьць пратэстныя настроі, вельмі моцныя, але ёсьць і надзея. І вось людзі абмяркоўваюць гэтую надзею і што трэба рабіць, каб сапраўды памянялася сытуацыя ў краіне. І гэта вельмі добра, таму што ўсё больш людзей уключаецца ў гэтае абмеркаваньне, а праз гэта ўключаецца ў кампанію".

Андрэй Саньнікаў да канца кампаніі зьбіраецца наведаць усе буйныя гарады Беларусі.

Першую сустрэчу ў Магілёве ўчора правёў Уладзімер Някляеў. У актавую залю на ўскраіне гораду прыйшло каля 100 чалавек, паведаміла прэсавая сакратарка Някляева Юлія Рымашэўская:

"Галоўнае пытаньне, якое абмяркоўвалася, — гэта тое, якім чынам і дзе браць грошы Беларусі, калі яна зьменіць прэзыдэнта. Адпаведна, вакол гэтага была цэлая дыскусія: а ці ведаюць яны, адкуль сёньня бяруць грошы, ці ўпэўненыя яны ў тым, што пазычаць грошы — гэта адзіная крыніца здабываньня рэсурсаў. А па-другое, людзей хвалявала сацыяльная палітыка, ільготы, адукацыя".

Юлія Рымашэўская кажа, што ёсьць пэўныя праблемы і недахопы з арганізацыяй сходаў, але яны вырашаюцца. Уладзімер Някляеў у гэтую суботу наведае Оршу, у нядзелю — Віцебск.

Кандыдат ад БХД Віталь Рымашэўскі наведаў Бабруйск, Клічаў, Асіповічы. Ён аддае перавагу пікетам, бо мясцовыя ўлады даюць залі наводшыбе, дзе цяжка сабраць шмат людзей.

"Гэта парушэньне права на свабодныя выбары, бо сустрэцца зь людзьмі ў зручных месцах немагчыма. А што тычыцца вулічных сустрэч, то для іх выдзеленыя сабачнікі, нейкія балоты, мясьціны на ўскрайку. Таму мы сустракаемся там, дзе нам зручна. Так было ў Бабруйску, дзе мы цягам дзьвюх гадзін сустракаліся зь людзьмі каля ўваходу ў вакзал. 300 чалавек удзельнічала ў сустрэчы, таму што гэта люднае месца".

Спадар Рымашэўскі кажа, што падчас ягонай сустрэчы ў Бабруйску больш за 30 чалавек запісалася ў партыю БХД і назіральнікамі на выбарчыя ўчасткі:

"Калі гэта не пратэстны настрой, то што тады? Людзі гатовыя і чакаюць альтэрнатывы. Тое, што людзі стаміліся ад Лукашэнкі, што ён ніяк не набірае 50 працэнтаў галасоў у першым туры, ня будзе ў яго гэтага, калі ён не фальсыфікуе выбары, — гэта абсалютна зразумела".

Кандыдат ад БНФ Рыгор Кастусёў сёньня выправіўся ў першую агітацыйную паездку па маршруце Дрыбін — Горкі — Орша. У суботу ён наведае Слуцак, у нядзелю — Магілёў, Бялынічы, Круглае, Шклоў, а далей графік ягоных паездак расьпісаны да 18 сьнежня.

"Мы зрабілі выснову, што менавіта сустрэчы зь людзьмі маюць найбольшы станоўчы эфэкт. Прысутнасьць кандыдата ў людзей выклікае вялікую цікавасьць. Большасьць людзей, з кім сустракаемся, ставяцца да нас станоўча, кажуць, што робяцца нашымі прыхільнікамі. А гэтыя людзі, паразмаўляўшы са сваімі суседзямі, са сваёй раднёй, яны будуць яшчэ як нашыя агітатары".