Лінкі ўнівэрсальнага доступу

logo-print
Сёньня ў Менску з аднадзённым візытам знаходзіцца намесьнік памочніка дзяржаўнага сакратара ЗША Дэніэл Расэл. У яго маюць адбыцца сустрэчы зь міністрам замежных спраў Беларусі Сяргеем Мартынавым, некаторымі кандыдатамі ў прэзыдэнты ад апазыцыйных палітычных партыяў і дэмакратычных рухаў. Таксама спадар Расэл зьбіраецца сустрэцца з прадстаўнікамі недзяржаўных арганізацыяў, якія вядуць назіраньне за выбарамі.

У рамках рабочага візыту ў Беларусь Дэніэл Расэл усе сустрэчы праводзіць у другой палове сёньняшняга дня. І паводле той інфармацыі, якой мы валодаем, скончацца яны дзесьці каля 9-й гадзіны вечару. А пачаўся візыт з сустрэчы намесьніка памочніка дзяржаўнага сакратара ЗША з кіраўніком зьнешнепалітычнага ведамства Беларусі Сяргеем Мартынавым. Сустрэча доўжылася амаль дзьве гадзіны.

Прэсавы сакратар МЗС Беларусі Андрэй Савіных у размове са «Свабодай» сказаў пра гэтыя перамовы наступнае:

«Толькі што завяршылася сустрэча міністра замежных спраў Беларусі Сяргея Мартынава з намесьнікам памочніка Дзяржсакратара ЗША Дэніэлам Расэлам, які знаходзіцца ў Менску з рабочым візытам. Падчас сустрэчы абмяркоўваліся пытаньні, якія зьвязаныя з разьвіцьцём двухбаковых беларуска-амэрыканскіх дачыненьняў. Удзельнікі сустрэчы таксама абмяняліся думкамі па той міжнароднай праблематыцы, якая мае двухбаковы інтарэс».

Міжнародны аглядальнік Раман Якаўлеўскі кажа, што гэты прыезд амэрыканскага чыноўніка мае выяўныя паралелі з тымі візытамі, якія адбыліся апошнім часам з эўрапейскага кірунку:
Стратэгія такая, што на першае месца ставяцца дэмакратычныя каштоўнасьці.

«Калі гавораць пра каардынацыю альбо іншыя формы супрацоўніцтва паміж ЗША і Эўразьвязам у дачыненьнях зь Беларусьсю, то тут могуць быць разыходжаньні ў тактыцы, але не ў стратэгіі. А стратэгія такая, што на першае месца ставяцца дэмакратычныя каштоўнасьці. І пра гэта казалі міністры Сікорскі і Вэстэрвэле, калі яны прыяжджалі ў Менск. І пра гэта, я ўпэўнены, усюды ў Менску будзе казаць і прадстаўнік Вашынгтону. Бо ў ЗША на першым месцы заўжды правы чалавека».

У міністэрстве замежных спраў Беларусі адзначаюць, што сёньня абмяркоўваліся пытаньні, «зьвязаныя з разьвіцьцём двухбаковых беларуска-амэрыканскіх дачыненьняў». Міжнародны аглядальнік Раман Якаўлеўскі ўпэўнены: сёньня бакі не маглі абмінуць праблему аднаўленьня паўнавартаснай працы амбасады ЗША ў Менску. Аднак спадар Якаўлеўскі ня думае, што гэта пытаньне будзе хутка вырашана:

«Аніякіх прыкмет, што такія зьмены чакаюцца, няма. Паводле маёй прыватнай інфармацыі, амэрыканскі бок чакае крокаў ад беларускага. Беларусы першымі павінны зрабіць такія крокі».

Паказаць камэнтары

XS
SM
MD
LG